കൊച്ചി: നിരവധി മോഷണക്കേസിലെയും, മയക്കുമരുന്ന്‌ കേസിലെയും പ്രതിയും കിഴക്കമ്പലം മാര്‍ക്കറ്റിന്‌ സമീപം താമസിക്കുന്ന കാട്ടുപറമ്പില്‍ വീട്ടില്‍ റഷിദിന്റെ മകന്‍ 44 വയസ്സുള്ള അബ്ദുള്‍ സലാമിനെ കലൂര്‍ ഭാഗത്ത്‌ വെച്ച്‌ കഞ്ചാവ്‌ വില്‍ക്കാന്‍ ശ്രമിക്കുന്നതിനിടെ ഷാഡോ പോലീസ്‌ പിടികൂടി.
ഇയാളുടെ പക്കല്‍നിന്ന്‌ അരക്കിലോയോളം കഞ്ചാവ്‌ പിടിച്ചെടുത്തിട്ടുണ്ട്‌. ഒരു മാസം മുമ്പാണ്‌ ഇയാള്‍ ജയില്‍ ശിക്ഷ കഴിഞ്ഞ്‌ പുറത്തിറങ്ങിയത്‌. സ്കൂള്‍, കോളേജ്‌ വിദ്യാര്‍ത്ഥികള്‍, യുവാക്കള്‍ തുടങ്ങിയവരാണ്‌ ഇയാളുടെ ഉപഭോക്താക്കള്‍ മൊബെയില്‍ ഫോണ്‍ മുഖേന ഉപഭോക്താക്കളുമായി ബന്ധപ്പെട്ട ശേഷം കഞ്ചാവ്‌ പേപ്പര്‍ പൊതികളിലാക്കി ബൈക്കിലാണ്‌ ഇയാള്‍ വില്‍പ്പന നടത്തിയിരുന്നത്‌. ഇടുക്കിയില്‍ നിന്നാണ്‌ കഞ്ചാവ്‌ വില്‍പനക്കായി കൊണ്ടുവരുന്നതെന്ന്‌ അന്വേഷണത്തില്‍ പോലീസിന്‌ അറിയാന്‍ കഴിഞ്ഞിട്ടുണ്ട്‌.
സ്പെഷ്യല്‍ ബ്രാഞ്ച്‌ അസിസ്റ്റന്റ്‌ കമ്മീഷണര്‍ എം.എന്‍.രമേഷിന്‌ കിട്ടിയ രഹസ്യവിവരത്തിന്റെ അടിസ്ഥാനത്തില്‍ ഷാഡോ എസ്‌ഐ മുഹമ്മദ്‌ നിസാറും, നോര്‍ത്ത്‌ എസ്‌ഐ വിജയ്‌ ശങ്കറും, ഷാഡോ പോലീസുകാരായ ഹുസൈന്‍, ഉമ്മര്‍, മനാഷ്‌, അനൂപ്‌, നസീര്‍ എന്നിവരും നോര്‍ത്ത്‌ പോലീസും ചേര്‍ന്നാണ്‌ പ്രതിയെ പിടികൂടിയത്‌.
മയക്കുമരുന്ന്‌ വില്‍പ്പനയെക്കുറിച്ചുള്ള വിവരങ്ങള്‍ കിട്ടിയാല്‍ 9497980440 എന്ന നമ്പറില്‍ അറിയിക്കാന്‍ പൗര സമൂഹം ജാഗ്രത പാലിക്കണമെന്ന്‌ സിറ്റി പോലീസ്‌ കമ്മീഷണര്‍ എം.ആര്‍.അജിത്ത്‌ കുമാര്‍ ഐപിഎസ്‌ അറിയിച്ചു.
പ്രതികരിക്കാൻ ഇവിടെ എഴുതുക: