കൊല്‍ക്കത്ത: പശ്ചിമബംഗാളിലെ ഡയമണ്ട്‌ ഹാര്‍ബറില്‍ നടന്ന വ്യാജമദ്യദുരന്തക്കേസില്‍ പ്രദേശത്തിന്റെ ചുമതലയുള്ള എക്സൈസ്‌ ഓഫീസര്‍ രദേശ്വര്‍ പാണ്ഡയെ സസ്പെന്റ്‌ ചെയ്തുകൊണ്ട്‌ സംസ്ഥാന സര്‍ക്കാര്‍ ഇന്നലെ ഉത്തരവിറക്കി. സംഭവത്തെത്തുടര്‍ന്നുണ്ടായ വകുപ്പുതല അന്വേഷണത്തിലാണ്‌ പാണ്ഡെ കുറ്റക്കാരനാണെന്ന്‌ കണ്ടെത്തിയത്‌. കൂടുതല്‍ ഉദ്യോഗസ്ഥര്‍ക്കെതിരെ നടപടിയുണ്ടായേക്കുമെന്നാണ്‌ റിപ്പോര്‍ട്ടുകള്‍ വ്യക്തമാക്കുന്നത്‌.
അതിനിടെ വ്യാജമദ്യദുരന്തക്കേസില്‍ മരിച്ചവരുടെ എണ്ണം 155 ആയി ഉയര്‍ന്നു. മുന്നൂറോളം പേര്‍ ഇപ്പോഴും വിവിധ ആശുപത്രികളിലായി ചികിത്സയിലാണ്‌. സൗത്ത്‌ 24 പരഗനാസ്‌ ജില്ലയിലെ സന്‍ഗ്രാംപൂരിലാണ്‌ കൂടുതല്‍ മരണങ്ങള്‍ റിപ്പോര്‍ട്ട്‌ ചെയ്യപ്പെട്ടിട്ടുള്ളത്‌. ജില്ലയിലെ വ്യാജമദ്യശാലകളില്‍നിന്നും സാമ്പിള്‍ ഫോറന്‍സിക്‌ പരിശോധനയ്‌ക്ക്‌ കൊണ്ടുപോയിട്ടുണ്ട്‌. ഇന്നലെ ജില്ലയില്‍ ഉദ്യോഗസ്ഥര്‍ നടത്തിയ റെയ്ഡിനെത്തുടര്‍ന്ന്‌ പന്ത്രണ്ട്‌ പേരെ അറസ്റ്റ്‌ ചെയ്തു. സംഭവത്തെക്കുറിച്ച്‌ അന്വേഷിക്കാന്‍ കഴിഞ്ഞദിവസം സിഐ അന്വേഷണത്തിന്‌ മുഖ്യമന്ത്രി മമതാ ബാനര്‍ജി ഉത്തരവിട്ടിരുന്നു.
സന്‍ഗ്രാംപൂരില്‍ കഴിഞ്ഞദിവസവും രോഷാകുലരായ ജനങ്ങള്‍ വ്യാജമദ്യശാലകള്‍ തല്ലിത്തകര്‍ക്കുകയും കത്തിക്കുകയും ചെയ്തു.
ഇതിനിടെ പശ്ചിമബംഗാളില്‍ വ്യാജമദ്യം കഴിച്ച്‌ മരിച്ചവരുടെ എണ്ണം 167 ആയി. സംഭവവുമായി ബന്ധപ്പെട്ട്‌ രണ്ട്‌ പേര്‍ കൂടി പോലീസ്‌ പിടിയിലായി. ഇതോടെ അറസ്റ്റിലായവരുടെ എണ്ണം 12 ആയി. മദ്യഷാപ്പ്‌ ഉടമ ബാദ്ഷ ഖോകന്‍ ഇപ്പോഴും ഒളിവിലാണ്‌. മരണസംഖ്യ ഉയരുമെന്നാണ്‌ കരുതുന്നത്‌. നിരവധി പേരുടെ നില അത്യന്തം ഗുരുതരമാണെന്ന്‌ ആശുപത്രി അധികൃതര്‍ പറഞ്ഞു. ദുരന്തത്തിന്‌ ഇരയായവരില്‍ കൂടുതലും തൊഴിലാളികളും ഓട്ടോ റിക്ഷ ഡ്രൈവര്‍മാരുമാണ്‌.
ഇവരെ ഡയമണ്ട്‌ ഹാര്‍ബര്‍ ആശുപത്രി എംആര്‍ ബാന്‍ഗുര്‍ ആശുപത്രി, നാഷണല്‍ മെഡിക്കല്‍ ഹോസ്പിറ്റല്‍ എന്നിവിടങ്ങളിലാണ്‌ പ്രവേശിപ്പിച്ചിരിക്കുന്നത്‌.
ഡയമണ്ട്‌ ആശുപത്രിയില്‍ ചികിത്സയില്‍ കഴിയുന്ന 90 പേരില്‍ രണ്ട്‌ പേരുടെ നില ഗുരുതരമാണ്‌. വ്യാജമദ്യ ദുരന്തത്തെ തുടര്‍ന്ന്‌ ഡോക്ടര്‍മാര്‍, നേഴ്സുമാര്‍, പാരാമെഡിക്കല്‍ ഉദ്യോഗസ്ഥര്‍ എന്നിവരുടെ അവധി റദ്ദാക്കി ജോലിയില്‍ പ്രവേശിക്കാന്‍ ആരോഗ്യവകുപ്പ്‌ നിര്‍ദ്ദേശം നല്‍കിയിരുന്നു.
ചൊവ്വാഴ്ചയാണ്‌ വ്യാജമദ്യ ദുരന്തം ഉണ്ടായത്‌. സിഐഡി അന്വേഷണത്തിന്‌ പശ്ചിമ ബംഗാള്‍ മുഖ്യമന്ത്രി മമത ബാനര്‍ജി ഉത്തരവിട്ടിട്ടുണ്ട്‌. എഎംആര്‍ഐ ഹോസ്പിറ്റലില്‍ 93 പേരുടെ മരണത്തിനിടയാക്കിയ തീപിടിത്തം നടന്ന്‌ ഒരാഴ്ച തികയുന്നതിനുള്ളിലാണ്‌ വ്യാജമദ്യ ദുരന്തത്തിനുകൂടി പശ്ചിമ ബംഗാള്‍ സാക്ഷിയാകേണ്ടിവന്നത്‌.
പ്രതികരിക്കാൻ ഇവിടെ എഴുതുക: