ന്യൂദൽഹി: അമേരിക്കയിൽ മോദി-മസ്ക് കൂടിക്കാഴ്ചയ്ക്ക് പിന്നാലെ ആഗോള ഇലക്ട്രിക് കാര്‍ ഭീമനായ ടെസ്ല ഇന്ത്യൻ വിപണിയിൽ ചുവടുവയ്‌ക്കാൻ തുടങ്ങുന്നു. പ്രാരംഭ നടപടികളുടേ ഭാഗമായി ടെസ്ല ഇന്ത്യയില്‍ റിക്രൂട്ട്‌മെന്റ് നടപടികള്‍ ആരംഭിച്ചു. 13 തസ്തികകളിലേക്ക് ഉദ്യോഗാര്‍ഥികളെ തേടി ലിങ്ക്ഡ് ഇന്‍ പേജില്‍ കമ്പനി പരസ്യം നല്‍കി. സര്‍വീസ് ടെക്‌നീഷ്യന്‍, വിവിധ ഉപദേശക തസ്തികകള്‍ ഉള്‍പ്പെടെയുള്ള ഒഴിവുകള്‍ മുംബൈയിലും ന്യൂദല്‍ഹിയിലുമാണ്. കസ്റ്റമര്‍ എന്‍ഗേജ്‌മെന്റ് മാനേജര്‍, ഡെലിവറി ഓപ്പറേഷന്‍സ് സ്‌പെഷ്യലിസ്റ്റ് തുടങ്ങിയ ഒഴിവുകള്‍ മുംബൈയിലാണ്.
ടെസ്ല ഇന്ത്യയിലേക്ക് വരാന്‍ നേരത്തെ തന്നെ താല്‍പര്യം പ്രകടിപ്പിച്ചിരുന്നുവെങ്കിലും ഉയര്‍ന്ന ഇറക്കുമതിതീരുവ കമ്പനിയെ ഈ നീക്കത്തില്‍ നിന്ന് പിന്തിരിപ്പിക്കുകയായിരുന്നു. എന്നാല്‍ കഴിഞ്ഞ ബജറ്റില്‍ 40,000 ഡോളറില്‍ കൂടുതല്‍ വിലയുള്ള, ഉയര്‍ന്ന നിലവാരമുള്ള കാറുകളുടെ അടിസ്ഥാന കസ്റ്റംസ് തീരുവ 110 ശതമാനത്തില്‍നിന്ന് 70 ശതമാനമായി കുറയ്‌ക്കുമെന്ന് പ്രഖ്യാപിച്ചിരുന്നു. ഇത് ബഹുരാഷ്‌ട്ര വാഹന കമ്പനികളെ ഇന്ത്യന്‍ വിപണിയിലേക്ക് കൂടുതല്‍ ആകര്‍ഷിക്കാന്‍ കാരണമായിട്ടുണ്ട് .
ചൈന കഴിഞ്ഞാല്‍ വൈദ്യുതവാഹന വിപണിയില്‍ രണ്ടാമതാണ് ഇന്ത്യ. ചൈനയുടെ 11 മില്ല്യണുമായി താരതമ്യപ്പെടുത്തുമ്പോള്‍ കഴിഞ്ഞ വര്‍ഷം ഇന്ത്യയുടെ ഇലക്ട്രിക് കാര്‍ വില്‍പന ഒരു ലക്ഷമാണ്. രാജ്യത്ത് ടെസ്‌ലയുടെ വരവോടെ വൈദ്യുതവാഹന വിപണിയില്‍ വന്‍ കുതിപ്പാണ് പ്രതീക്ഷിക്കുന്നത്. ടെസ്‌ലയും ഇന്ത്യയെ മികച്ച വിപണിയായാണ് കണക്കാക്കുന്നത്. ആദ്യഘട്ടത്തില്‍ കാറുകള്‍ ഇറക്കുമതി ചെയ്യാനും തുടര്‍ന്ന് തദ്ദേശീയമായി നിര്‍മിക്കാനുമാണ് ടെസ്‌ലയുടെ പദ്ധതിയെന്നാണ് നിഗമനം.
പ്രതികരിക്കാൻ ഇവിടെ എഴുതുക: