തിരുവനന്തപുരം: ബാലരാമപുരത്ത് രണ്ടുവയസുകാരി ദേവേന്ദുവിനെ കിണറ്റിലെറിഞ്ഞു കൊലപ്പെടുത്തിയ കേസുമായി ബന്ധപ്പെട്ട് മന്ത്രിവാദി കസ്റ്റഡിയില്‍. ശംഖുമുഖം ദേവീദാസന്‍ എന്നറിയപ്പെടുന്ന പ്രദീപ്കുമാറിനെയാണ് പൊലീസ് കസ്റ്റഡിയിലെടുത്തത്.
തന്നെ സാമ്പത്തികമായി വഞ്ചിച്ചെന്ന് ശ്രീതു മൊഴി നല്‍കിയിരുന്നു. ഇതേത്തുടര്‍ന്നാണ് ദേവീദാസനെ കസ്റ്റഡിയിലെടുത്ത് ചോദ്യം ചെയ്തത്. വിവിധ പേരുകളില്‍ പല ജോലികളിലും ഏര്‍പ്പെട്ടിട്ടുള്ള ദേവീദാസന്‍ ആദ്യം ട്യൂട്ടോറിയല്‍ അധ്യാപകനായിരുന്നു. പ്രദീപ്കുമാറെന്നാണ് ശരിയായ പേര്. പിന്നീട് കാഥികന്‍ എസ്പി കുമാറായി. അടുത്തകാലത്താണ് ദേവീദേവസനെന്ന മന്ത്രവാദിയായി അവതരിച്ചത്.
അതിനിടെ കുട്ടിയുടെ മരണത്തില്‍ ശ്രീതുവിന്റെ പങ്ക് അന്വേഷിക്കണമെന്ന് ഭര്‍ത്താവും ഭര്‍തൃപിതാവും പൊലീസിന് നല്‍കിയ മൊഴിയില്‍ ആവശ്യപ്പെട്ടു. അതേസമയം ദേവീദാസനെ കസ്റ്റഡിയിലെടുത്തത് സാമ്പത്തിക തിരിമറിയുമായി ബന്ധപ്പെട്ടാണെന്നും കൊലപാതകവുമായി ഭര്‍ത്താവിന് ബന്ധമില്ലെന്നും വീട്ടില്‍ മന്ത്രവാദം നടത്തുന്നില്ലെന്നും ഭാര്യ പറഞ്ഞു.
പ്രതികരിക്കാൻ ഇവിടെ എഴുതുക: