പ്രയാഗ്‌രാജ്: മൗനി അമാവാസി ദിനമായ ഇന്ന് മഹാകുംഭമേളയിലൂടെ, ആത്മപരിശോധന നടത്താനും, മൗനം പാലിച്ച് പവിത്രമായ ആചാരങ്ങളിലൂടെ ആത്മാവിന്റെ ശുദ്ധീകരണത്തിനുമായി പ്രയാഗ്‌രാജിലേക്ക് ഒഴുകിയെത്തുക പത്ത് കോടിയിലധികം ഭക്തര്‍. കുംഭമേളയിലെ ഏറ്റവും പ്രധാനപ്പെട്ട രണ്ടാമത്തെ അമൃത സ്‌നാന ദിവസം കൂടിയാണ് ഇന്ന്. വിപുലമായ ഒരുക്കങ്ങളാണ് മുഖ്യമന്ത്രി യോഗി ആദിത്യനാഥിന്റെ നേതൃത്വത്തില്‍ യുപി സര്‍ക്കാര്‍ നടത്തിയിരിക്കുന്നത്.
ഭക്തരുടെ തിരക്ക് ഒഴിവാക്കാന്‍ പ്രയാഗ്‌രാജിലെ മഹാകുംഭ മേഖലയെ വാഹന നിരോധന മേഖലയായി പ്രഖ്യാപിച്ചു. നിയുക്ത പാര്‍ക്കിങ് സ്ഥലത്തിനപ്പുറം വാഹനങ്ങള്‍ അനുവദിക്കില്ല. മേളയില്‍ പങ്കെടുക്കാന്‍ എത്തുന്ന എല്ലാവര്‍ക്കും തുല്യപരിഗണന നല്‍കുന്നതിന് ഇവിടെ വിഐപി നിരോധിത മേഖലയായും പ്രഖ്യാപിച്ചു. പോണ്ടൂണ്‍ പാലങ്ങളില്‍ ഗതാഗതം സുഗമമാക്കുന്നതിന് വണ്‍-വേ ട്രാഫിക് ഉണ്ടായിരിക്കും. അഘാഡകള്‍ക്ക് പോലും പ്രവേശനവും പുറത്തുകടക്കലും അനുവദിക്കുന്നത് അവര്‍ക്ക് അനുവദിച്ചിരിക്കുന്ന പ്രത്യേക സ്ലോട്ടുകളുടെ അടിസ്ഥാനത്തില്‍ ആയിരിക്കും. ഇത്തരത്തില്‍ നിരവധി പദ്ധതികളാണ് യോഗി സര്‍ക്കാര്‍ തയ്യാറാക്കിയിരിക്കുന്നത്.
പതിമൂന്നോളം അഘാഡകളില്‍ നിന്നുള്ള സാധുക്കള്‍ ഷാഹി സ്‌നാനത്തിനായി അമൃത് സ്‌നാനഘട്ടത്തിലേക്ക് പോകുമെന്നതിനാല്‍, അവര്‍ക്കായി സംഗമ പ്രദേശത്ത് പ്രത്യേക പ്രവേശന, എക്‌സിറ്റ് റൂട്ടുകള്‍ നിശ്ചയിച്ചിട്ടുണ്ട്. ഈ റൂട്ടുകള്‍ കൃത്യമായി പിന്തുടരുന്നുണ്ടെന്ന് ഉറപ്പാക്കാന്‍ കൂടുതല്‍ സുരക്ഷാ ഉദ്യോഗസ്ഥരെയും വിന്യസിച്ചു.
ഇതോടൊപ്പം റെയില്‍വേ സ്റ്റേഷനുകളില്‍ തിരക്ക് അനുഭവപ്പെടാത്ത വിധത്തില്‍ ട്രെയിനുകളുടെ നീക്കത്തിന് പ്രത്യേക പദ്ധതിയും റെയില്‍വേ തയ്യാറാക്കിയിട്ടുണ്ട്. ഇന്ന് എത്തുന്നവരില്‍ 10-20 ലക്ഷം പേര്‍ ട്രെയിനുകളില്‍ യാത്ര ചെയ്യും എന്നാണ് കണക്ക്. അതിനാല്‍ പ്രയാഗ്‌രാജിലെ ഒമ്പത് റെയില്‍വേ സ്റ്റേഷനുകളിലേക്കായി 150 ട്രെയിനുകള്‍ ഇന്ന് ഓടിക്കും. ഇത് പ്രകാരം പ്രയാഗ്‌രാജില്‍ നിന്ന് ഓരോ 4 മിനിറ്റിലും ഒരു ട്രെയിന്‍ ഓടുമെന്ന് പ്രതീക്ഷിക്കുന്നതായി റെയില്‍വേ അധികൃതര്‍ പറയുന്നു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: