കോഴിക്കോട്: മുനമ്പം ഭൂമി സംബന്ധിച്ച് സമസ്തയില്‍ തര്‍ക്കം. ഭൂമി വിട്ടുകൊടുക്കാന്‍ പറ്റില്ലെന്ന ലീഗ് വിരുദ്ധ ചേരിയുടെ നിലപാടിനെ എതിര്‍ത്ത് മറുപക്ഷം രംഗത്തെത്തി.സമസ്ത ജോയിന്റ് സെക്രട്ടറി ഉമ്മര്‍ ഫൈസി ഒരു സമ്മേളനത്തില്‍ മുനമ്പം ഭൂമി വിട്ടു നല്‍കാനാകില്ലെന്ന നിലപാടെടുത്തിരുന്നു.
യുവജനവിഭാഗം നേതാവ് മുസ്തഫ മുണ്ടുപാറ പാര്‍ട്ടി പത്രത്തില്‍ എഴുതിയ ലേഖനത്തിലും മുനമ്പത്തേത് വഖഫ് ഭൂമിയാണെന്നും വിട്ടുകൊടുക്കാനാവില്ലെന്നും വ്യക്തമാക്കി. ഭൂമി അവിടെ താമസിക്കുന്നവര്‍ക്ക് തന്നെ വിട്ടുനല്‍കണമെന്ന മുസ്ലിം കോര്‍ഡിനേഷന്‍ കമ്മിറ്റി യോഗ തീരുമാനം ഇരുവരും തള്ളി.
മുനമ്പത്തുളളത് വഖഫ് ഭൂമി തന്നെയാണെന്നും 1950ലാണ് അത് വഖഫായതെന്നുമാണ് സമസ്ത മുശാവറ അംഗം ഉമര്‍ ഫൈസി മുക്കം പറഞ്ഞത്. വഖഫ് സ്വത്ത് വില്‍ക്കാന്‍ പാടില്ല. അതറിയാതെ സ്ഥലം വാങ്ങിയവര്‍ക്ക് വിറ്റവരില്‍ നിന്ന് വില തിരികെ വാങ്ങികൊടുക്കുകയാണ് സര്‍ക്കാര്‍ ചെയ്യേണ്ടതെന്ന് ഉമര്‍ ഫൈസി മുക്കം പറഞ്ഞു.എന്നാല്‍ ഇതിനെതിരെ ഇ.കെ സുന്നി വിഭാഗത്തിലെ മുസ്ലിം ലീഗ് പക്ഷം രംഗത്തുവന്നു. സ്ഥലം വിലകൊടുത്തു വാങ്ങിയവരുടെ കണ്ണീര് അവഗണിക്കരുതെന്ന് പറഞ്ഞ അബ്ദു സമദ് പൂക്കോട്ടൂര്‍ മുനമ്പം വിഷയത്തില്‍ അഭിപ്രായം പറയേണ്ടത് സമസ്ത നേതൃത്വമാണെന്നും ആരെങ്കിലും പൊതുയോഗത്തിലോ മറ്റോ അഭിപ്രായം പറയുന്നത് സമസ്തയുടെ നിലപാടായി കാണാനാകില്ലെന്നും പറഞ്ഞു. സമസ്ത സംസ്ഥാന പ്രസിഡന്റോ ജനറല്‍ സെക്രട്ടറിയോ ആണ് നിലപാട് പറയേണ്ടത്.മുനമ്പം ഭൂമി വഖഫ് തന്നെയാണെന്നും എന്നാല്‍ അവിടെ ഭൂമി വാങ്ങിയവരെ തെരുവിലിറക്കാന്‍ പാടില്ലെന്നും സമസ്ത നേതാവ് അബ്ദു സമദ് പൂക്കോട്ടൂര്‍ പറഞ്ഞു.
പണം നല്‍കി ഭൂമി വാങ്ങിയവരും കുടികിടപ്പവകാശമുള്ളവരും മുമ്പത്ത് തന്നെ തുടരണം. ഇക്കാര്യത്തില്‍ ഉമര്‍ ഫൈസി മുക്കത്തിന്റെ പ്രതികരണം കാര്യങ്ങള്‍ മനസിലാക്കാതെയാണെന്നും അബ്ദു സമദ് പൂക്കോട്ടൂര്‍ പറഞ്ഞു.ഇതിനിടെ,വിഷയം കൂടുതല്‍ വര്‍ഗീയവല്‍ക്കരിക്കരുതെന്ന് പി കെ കുഞ്ഞാലിക്കുട്ടിയും പ്രതികരിച്ചു.
മുനമ്പം ഭൂമി വിഷയത്തില്‍ മുസ്ലിം ലീഗ് നടത്തുന്ന സമവായ നീക്കങ്ങളെ തടയാന്‍ കൂടി ലക്ഷ്യമിട്ടാണ് ലീഗുമായി ഇടഞ്ഞ ഇ കെ സുന്നികളുടെ നീക്കം. ഇടതു സര്‍ക്കാര്‍ വിഷയത്തില്‍ പരിഹാരം കാണാതിരിക്കവെയാണ് സര്‍ക്കാരുമായി നല്ല ബന്ധമുള്ള ഇ കെ സുന്നി വിഭാഗത്തില്‍ ഒരു വിഭാഗം ഭൂമി വിട്ടുകൊടുക്കാന്‍ ആകില്ല എന്ന് നിലപാട് വ്യക്തമാക്കിയത്. നിലപാട് മാറ്റത്തിന് പിന്നില്‍ സര്‍ക്കാറിന്റെ ഇടപെടല്‍ ഉണ്ടോ എന്ന സംശയവും മറുവിഭാഗത്തിനുണ്ട്.
പ്രതികരിക്കാൻ ഇവിടെ എഴുതുക: