തിരുവനന്തപുരം: പി.പി ദിവ്യയുടെ അറസ്റ്റ് ശുദ്ധ നാടകമാണെന്ന വിമർശനം ശുദ്ധ അസംബന്ധമാണെന്ന് സിപിഎം സംസ്ഥാന സെക്രട്ടറി എം.വി ഗോവിന്ദൻ. മാധ്യമങ്ങൾ സൃഷ്ടിച്ച പുകമറയിൽ നിന്നുകൊണ്ടാണ് പ്രതിപക്ഷ നേതാവ് ഉൾപ്പടെയുള്ളവർ ഇത്തരം ആരോപണങ്ങൾ ഉന്നയിക്കുന്നതെന്നും അദ്ദേഹം പറഞ്ഞു.
ദിവ്യയുടെ അറസ്റ്റുമായി ബന്ധപ്പെട്ട് പോലീസ് സ്വീകരിച്ചത് ശരിയായ നടപടിയാണ്. പ്രതിയായി തീരുമാനിക്കപ്പെട്ട ഒരാളെ അറസ്റ്റ് ചെയ്താല്‍ ആശുപത്രിയിലും കോടതിയുടെ മുന്നിലും ജയിലിലും എത്തിക്കുക എന്ന മൂന്ന് പ്രക്രിയയല്ലേ നടന്നത്. അതിനെ തെറ്റായ രീതിയില്‍ വിശദീകരിച്ച് മാധ്യമങ്ങൾ പുകമറ സൃഷ്ടിക്കുകയായിരുന്നു. സർക്കാർ ശരിയായ നിലപാടാണ് സ്വീകരിച്ചതെന്നും പോലീസും അതില്‍ തെറ്റൊന്നും ചെയ്തിട്ടില്ലെന്നും അദ്ദേഹം വ്യക്തമാക്കി.
മാധ്യമങ്ങളുടെ ഇത്തരം വിമർശനങ്ങൾ ജനാധിപത്യപരമല്ല. ദിവ്യക്കെതിരെ എന്ത് നടപടി വേണമെന്ന കാര്യം പാർട്ടി തീരുമാനിച്ചോളും. അത് മാധ്യമങ്ങളുടെ മുന്നില്‍ പറയേണ്ട കാര്യമില്ലെന്നും എം.വി ഗോവിന്ദന്‍ പറഞ്ഞു.
പ്രതികരിക്കാൻ ഇവിടെ എഴുതുക: