പത്തനംതിട്ട: കൊടൈക്കനാലില്‍ വച്ച് നഷ്ടമായ ഫോണ്‍ അരമണിക്കൂറിനുള്ളില്‍ കണ്ടെത്തി നല്‍കി കേരള പൊലീസ്. തിരുവനന്തപുരം സ്വദേശിക്ക് നഷ്ടപ്പെട്ട ഫോണാണ്് അരമണിക്കൂറിനുള്ളില്‍ കണ്ടെത്തി ഏല്‍പ്പിച്ചത്. തിരുവല്ലയിലെ പൊലീസ് ഉദ്യോഗസ്ഥരാണ് ഫോണ്‍ കണ്ടെത്തി തിരികെ ഏല്‍പ്പിച്ചത്. വിനോദയാത്ര പോയ തിരുവനന്തപുരം സ്വദേശി വിമലിന്റെ മൊബൈല്‍ ഫോണ്‍ ഇന്നലെ രാത്രി കൊടൈക്കനാലില്‍ വച്ച് നഷ്ടപ്പെട്ടത്.
ഫോണിനായി അന്വേഷണം തുടങ്ങിയ യുവാവ് ഫൈന്‍ഡ് മൈ ഡിവൈസ് സംവിധാനം (find my device) ഉപയോഗിച്ച് ഫോണ്‍ ചങ്ങനാശ്ശേരി ഭാഗത്തുണ്ടെന്ന് മനസിലാക്കി. ഇതിന് പിന്നാലെയാണ് ചങ്ങനാശ്ശേരിയില്‍ നിന്ന് ഫോണ്‍ കണ്ടെത്താന്‍ പൊലീസ് സഹായം തേടിയത്. വിനോദയാത്രയ്‌ക്ക് പിന്നാലെ തിരുവനന്തപുരത്തേക്ക് മടങ്ങുമ്പോഴാണ് ഫോണിന്റെ ലൊക്കേഷന്‍ യുവാവിന് ലഭിക്കുന്നത്. തൊട്ടടുത്ത പൊലീസ് സ്റ്റേഷന്‍ എന്ന നിലയിലായിരുന്നു യുവാവ് തിരുവല്ല പൊലീസ് സ്റ്റേഷനിലെത്തിയത്.
പുലര്‍ച്ചെയാണ് ഫോണ്‍ കണ്ടെത്താന്‍ തിരുവല്ല പൊലീസിന്റെ സഹായം തേടി യുവാവ് എത്തിയത്. ഫോണില്‍ ചാര്‍ജ് നന്നേ കുറവാണെന്ന് മനസിലാക്കിയ തിരുവല്ല പൊലീസ് സ്വന്തം സ്റ്റേഷന്‍ പരിധി അല്ലെങ്കിലും ചങ്ങനാശ്ശേരിക്ക് കുതിച്ചു. ലൊക്കേഷനില്‍ നിന്ന് ഫോണ്‍ കണ്ടെത്തുകയും ചെയ്യുകയായിരുന്നു. ചങ്ങനാശ്ശേരിയില്‍ താമസിക്കുന്ന തമിഴ്‌നാട് സ്വദേശിയുടെ കയ്യില്‍ നിന്നാണ് ഫോണ്‍ കണ്ടെത്തിയത്. കൊടൈക്കനാലില്‍ ഇതേ ദിവസം ടൂര്‍ പോയിരുന്ന ഈ യുവാവ് അവിടെവച്ച് കളഞ്ഞു കിട്ടിയ ഫോണ്‍ ചങ്ങനാശ്ശേരിക്ക് കൊണ്ടുവരികയായിരുന്നു.
പ്രതികരിക്കാൻ ഇവിടെ എഴുതുക: