ന്യൂഡല്‍ഹി: ഹരിയാന രാഷ്ട്രീയത്തിലേക്ക് ഇന്ത്യാ സഖ്യത്തിനൊപ്പം ചുവടുവെച്ച് ഗുസ്തി താരം വിനേഷ് ഫോഗട്ട് . കാര്‍ഷിക വിളകളുടെ താങ്ങുവില വര്‍ദ്ധന ഉള്‍പ്പടെയുള്ള പ്രശ്‌നങ്ങള്‍ ഉയര്‍ത്തി പഞ്ചാബ് ഹരിയാന അതിര്‍ത്തിയില്‍ നടക്കുന്ന സമരത്തിന് പിന്തുണ പ്രഖ്യാപിച്ച് വിനേഷ് എത്തി. നിങ്ങളുടെ മകള്‍ നിങ്ങള്‍ക്കൊപ്പമുണ്ട് എന്നാണ് കര്‍ഷകരോട് അവര്‍ പറഞ്ഞത്.
ഗുസ്തി ഫെഡറേഷന്‍ മുന്‍ പ്രസിഡണ്ട് ബ്രിജ് ഭൂഷണിനെതിരെ വിനേഷ് ഫോഗട്ട് ഉള്‍പ്പെടെയുള്ളവര്‍ സമരരംഗത്തിറങ്ങിയപ്പോള്‍ കര്‍ഷക നേതാക്കള്‍ പിന്തുണയുമായി എത്തിയിരുന്നു. ഹരിയാനയിലെ ബലാലി സ്വദേശിയായ വിനേഷ് വരുന്ന നിയമസഭ തെരഞ്ഞെടുപ്പില്‍ മത്സരിക്കുമെന്ന് അഭ്യൂഹം ശക്തമായി നിലനില്‍ക്കെയാണ് പ്രാദേശിക രാഷ്‌ട്രീയ ലക്ഷ്യം മുന്‍നിര്‍ത്തി നടത്തുന്ന കര്‍ഷക സമരത്തിനൊപ്പമുള്ള ഈ പങ്കുചേരല്‍ . പ്രാദേശിക പാര്‍ട്ടികള്‍ക്കൊപ്പം കോണ്‍ഗ്രസും ഇവരെ സ്ഥാനാര്‍ത്ഥിത്വത്തിനായി സമീപിച്ചിരുന്നുവെന്ന് വാര്‍ത്തയുണ്ടായിരുന്നു. എന്നാല്‍ ഇക്കാര്യത്തില്‍ പരസ്യപ്രതികരണത്തിന് വിനേഷ് തയ്യാറായിട്ടില്ല. ബിജെപി വിരുദ്ധ ചേരിയില്‍ താനുണ്ടാകുമെന്നാണ് അടുപ്പമുള്ളവരോട് ഗുസ്തിതാരം മനസു തുറന്നതെന്ന് അറിയുന്നു.
പ്രതികരിക്കാൻ ഇവിടെ എഴുതുക: