അമ്പലപ്പുഴ: അമ്പലപ്പുഴയുടെ കഥാകാരന് അമ്പലപ്പുഴയുടെ മണ്ണില്‍ അന്ത്യനിദ്ര. നൂറുകണക്കിന് ശിഷ്യരുടെയും, സാഹിത്യപ്രേമികളുടെയും, സംഘവിവിധ ക്ഷേത്ര പ്രവര്‍ത്തകരുടെയും, കലാസാഹിത്യ രംഗങ്ങളിലെ പ്രമുഖരുടെയും, നാട്ടുകാരുടെയും സാന്നിദ്ധ്യത്തിലാണ് ഡോ. അമ്പലപ്പുഴ ഗോപകുമാറിന്റെ മൃതദേഹം സംസ്‌ക്കരിച്ചത്.
ഞായറാഴ്ച ഉച്ച കഴിഞ്ഞ് മൃതദേഹം അമ്പലപ്പുഴയിലെ വീട്ടില്‍ കൊണ്ടു വന്നപ്പോള്‍ മുതല്‍ ആദരാഞ്ജലി അര്‍പ്പിക്കാന്‍ നിരവധി പേര്‍ എത്തിച്ചേര്‍ന്നു. വിദുര പ്രദേശങ്ങളില്‍ നിന്ന് വരെ ശിഷ്യര്‍ പ്രീയ ഗുരുനാഥനെ അവസാനമായി കാണാനെത്തി. ഇന്നലെ രാവിലെ അമ്പലപ്പുഴ മോഡല്‍ ഗവ. എച്ച്എസ്എസില്‍ പൊതുദര്‍ശനത്തിന് വെച്ചപ്പോള്‍ വിദ്യാര്‍ത്ഥികള്‍ അടക്കം ആദരാഞ്ജലി അര്‍പ്പിച്ചു. പിന്നീട് വീട്ടിലെത്തിച്ച ശേഷം രണ്ടു മണിയോടെ ശാന്തി മന്ത്രം ചൊല്ലിയാണ് ഗുരുനാഥന് വിടയേകിയത്. അമ്പലപ്പുഴ ഉണ്ണിക്കണ്ണന്റെ മണ്ണില്‍ അമ്പലപ്പുഴയുടെ പ്രീയ ചരിത്രകാരന് അന്ത്യവിശ്രമം. അമ്പലപ്പുഴ ഗോപകുമാര്‍ ഇനി ജനഹൃദയങ്ങളില്‍ അനശ്വരന്‍.
പ്രതികരിക്കാൻ ഇവിടെ എഴുതുക: