കോഴിക്കോട്: അടിവാരത്ത് നിന്ന് തട്ടിക്കൊണ്ടുപോയ മൊബൈല്‍ഷോപ്പ് ഉടമ ഹര്‍ഷാദിനെ വയനാട് വൈത്തിരിയില്‍ നിന്നും കണ്ടെത്തി. തട്ടിക്കൊണ്ടുപോയ സംഘം വൈത്തിരിയില്‍ ഹര്‍ഷാദിനെ ഇറക്കി വിട്ടു.
കോഴിക്കോട് മൂഴിക്കലില്‍ മൊബൈല്‍ കട നടത്തി വന്ന ചെറുപറ്റ സ്വദേശി ഹര്‍ഷാദിനെ വെള്ളിയാഴ്ച രാത്രിയാണ് കാണാതായത്. അടിവാരത്തെ ഭാര്യവീട്ടിലായിരുന്ന ഹര്‍ഷാദ് രാത്രി 12ഓടെ ആരുടെയോ ഫോണ് വന്ന് പുറത്തേക്ക് പോയശേഷം മടങ്ങിയെത്തിയില്ല.
ശനിയാഴ്ച രാവിലെയും രാത്രിയും ഭാര്യ ഫോണ്‍ചെയ്തപ്പോള്‍ മലപ്പുറത്താണെന്നും ഒപ്പമുള്ളവര്‍ പണം ആവശ്യപ്പെടുന്നുണ്ടെന്നുമായിരുന്നു മറുപടി നല്‍കിയത്. ഹര്‍ഷാദിനെ തട്ടികൊണ്ടു പോയെന്ന് കാട്ടി ഭാര്യ ഷഹല താമരശേരി പൊലീസില്‍ പരാതി നല്‍കിയിരുന്നു.
ഹര്‍ഷാദിന് കാരാടി സ്വദേശിയുമായി 10 ലക്ഷം രൂപയുടെ ഇടപാടുണ്ടായിരുന്നെന്നാണ് പൊലീസ് പറയുന്നത്. ഇത് തിരികെ കിട്ടാനാകാം തട്ടികൊണ്ടു പോയതെന്നാണ് നിഗമനം. തട്ടിക്കൊണ്ടു പോകാന്‍ ഉപയോഗിച്ചെന്ന് കരുതുന്ന കാര്‍ അമ്പായത്തോട്ടില്‍ നിന്ന് നേരത്തേ പൊലീസ് കണ്ടെടുത്തിരുന്നു.
പ്രതികരിക്കാൻ ഇവിടെ എഴുതുക: