കൊച്ചി: അദ്ധ്യാപകന്റെ കൈപ്പത്തി വെട്ടിമാറ്റിയ കേസിലെ മുഖ്യപ്രതി സവാദിനെ ഒളിവില്‍ കഴിയാന്‍ സഹായിച്ചവരെ എന്‍ഐഎ കണ്ടെത്തി.
പ്രതി ഉപയോഗിച്ച ഫോണിന്റെ സൈബര്‍ ഫോറന്‍സിക്ക് പരിശോധനയിലാണ് നിരന്തരം ബന്ധപ്പെട്ടിരുന്നവരെയും ഒളിത്താവളം ഒരുക്കിയവരെയും കുറിച്ച് വിവരം ലഭിച്ചത്. മതനിന്ദ ആരോപിച്ച് പ്രൊഫ.ടി.ജെ. ജോസഫിന്റെ കൈപ്പത്തി വെട്ടിമാറ്റിയ ശേഷം 13 വര്‍ഷവും സവാദ് ഒളിവില്‍ കഴിഞ്ഞത് ഷാജഹാന്‍ എന്ന പേരിലായിരുന്നു. പിഎഫ്ഐ മതഭീകര ഗ്രൂപ്പുകളാണ് സവാദിന് സുരക്ഷിതമായ താവളം ഒരുക്കിയത്. പോപ്പുലര്‍ ഫ്രണ്ടിന്റെ കേന്ദ്രങ്ങളില്‍ താമസിച്ച സവാദ് നേതാക്കളെ മാത്രമാണ് ഫോണിലൂടെ ബന്ധപ്പെട്ടിരുന്നത്. ഒളിത്താവളം ഒരുക്കിയവരെ കുറിച്ചുള്ള കൂടുതല്‍ വിശദാംശങ്ങള്‍ സവാദില്‍ നിന്ന് ശേഖരിക്കാനാണ് എന്‍ഐഎയുടെ ശ്രമം. തെളിവുകള്‍ ശേഖരിച്ച ശേഷം കൂടുതല്‍ നടപടികളിലേക്ക് കടക്കുമെന്നാണ് സൂചന.
ജനുവരിയില്‍ കണ്ണൂര്‍ ജില്ലയിലെ മട്ടന്നൂരില്‍ നിന്നാണ് മുഖ്യപ്രതിയെ എന്‍ഐഎ അറസ്റ്റ് ചെയ്തത്. അദ്ധ്യാപകനെ ആക്രമിക്കുമ്പോള്‍ കൂട്ടുപ്രതികളുടെ വെട്ടേറ്റ് സവാദിന് പരിക്കേറ്റിരുന്നു. ഈ മുറിപ്പാടില്‍ നിന്നാണ് ഷാജഹാന്‍ സവാദ് തന്നെയെന്ന് എന്‍ഐഎ കണ്ടെത്തിയത്. നേരത്തെ 10 ദിവസത്തെ കസ്റ്റഡിയില്‍ ചോദ്യം ചെയ്ത പ്രതിയെ കുടുതല്‍ തെളിവുകളുടെ അടിസ്ഥാനത്തിലാണ് വീണ്ടും ചോദ്യം ചെയ്യുന്നത്.
പ്രതികരിക്കാൻ ഇവിടെ എഴുതുക: