പത്തനംതിട്ട : ജനറല്‍ ആശുപത്രിയില്‍ ചികിത്സാപിഴവ് മൂലം രോഗി മരിച്ചെന്ന് ആരോപണം. പന്തളം ചേരിക്കല്‍ സ്വദേശിനി ശ്യാമളയുടെ മരണം ചികിത്സാ പിഴവുമൂലമാണെന്നാണ് ഭര്‍ത്താവ് സേതുവും മകള്‍ യാമിയും ആരോപിക്കുന്നത്.
ആറു ദിവസം മുമ്പാണ് ഹൃദ്രോഗം ബാധിച്ച ശ്യാമളയെ പത്തനംതിട്ട ജനറല്‍ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചത്. തുടര്‍ന്ന് കുറച്ചു ദിവസങ്ങള്‍ക്കുശേഷം വാര്‍ഡിലേക്ക് മാറ്റുകയായിരുന്നു.കഴിഞ്ഞ രാത്രി അസ്വസ്ഥത പ്രകടിപ്പിച്ച ശ്യാമളയെ ആശുപത്രി അധികൃതര്‍ തിരിഞ്ഞുനോക്കിയില്ലെന്ന് ഭര്‍ത്താവും മകളും ആരോപിച്ചു.
എന്നാല്‍ ശ്യാമളയുടെ അടുത്ത ബന്ധുക്കള്‍ തന്നെ ആരോപണത്തിന് പിന്നില്‍ രാഷ്‌ട്രീയമാണെന്ന മറു ആരോപണവുമായും മുന്നോട്ട് വന്നു. കോണ്‍ഗ്രസ് അനുഭാവിയായ ശ്യാമളയുടെ ഭര്‍ത്താവ് സേതുവും മകളും തെരഞ്ഞെടുപ്പ് മുന്നില്‍കണ്ട് രാഷ്‌ട്രീയം കളിക്കുകയാണെന്ന് ഒരു വിഭാഗം ബന്ധുക്കളും സിപി എം പ്രവര്‍ത്തകരും കുറ്റപ്പെടുത്തി.ഇതിനിടെയാണ് ആന്റോ ആന്റണി എംപിയുടെ നേതൃത്വത്തില്‍ കോണ്‍ഗ്രസ് സംഘം സ്ഥലത്തെത്തിയത് . ഇതോടെ ബന്ധുക്കള്‍ തമ്മില്‍ ചേരി തിരിഞ്ഞ് വാഗ്വാദമായി.
സംഭവം കയ്യാങ്കളിയുടെ വക്കിലെത്തിയപ്പോള്‍ പൊലീസ് ഇടപെട്ടു . ശ്യാമളയുടെ ഭര്‍ത്താവിന്റെയും മകളുടെയും മൊഴി രേഖപ്പെടുത്തി മൃതദേഹം പോസ്റ്റുമോര്‍ട്ടത്തിനായി മോര്‍ച്ചറിയിലേക്ക് മാറ്റി . അതേസമയം ചികിത്സാ പിഴവുണ്ടായിട്ടില്ലെന്നും ശ്യാമള ഗുരുതര ഹൃദ് രോഗിയായിരുന്നുവെന്നും പത്തനംതിട്ട ജനറല്‍ ആശുപത്രി അധികൃതര്‍ പറയുന്നു.
പ്രതികരിക്കാൻ ഇവിടെ എഴുതുക: