കോഴിക്കോട് : ഐ ലീഗ് കിരീട പോരാട്ടത്തില് വന് തിരിച്ചടിയേറ്റ് ഗോകുലം കേരള എഫ് സി. ഇന്ന് നടന്ന മത്സരത്തില് മൊഹമ്മദന്സിനെ നേരിട്ട ഗോകുലം കേരള 3-2ന്റെ പരാജയമാണ് ഏറ്റുവാങ്ങിയത്.
ആദ്യം രണ്ട് ഗോളുകള്ക്ക് മുന്നില് എത്തിയ മൊഹമ്മദന്സിന് എതിരെ ഗോകുലം മികച്ച തിരിച്ചുവരവ് നടത്തി സ്കോര് 2-2 എന്ന നിലയിലെത്തിച്ചു. എന്നാല് അവസാനം ഗോകുലം കേരള പരാജയപ്പെടുകയായിരുന്നു.
16ാം മിനുട്ടില് ഹെര്ണാണ്ടസാണ് ആണ് മൊഹമ്മദന്സിന്റെ ആദ്യ ഗോള് നേടിയത്. 23ാം മിനുട്ടില് അലക്സിസ് ഗോമസിന്റെ ഗോളില് മൊഹമ്മദന്സ് ലീഡ് ഇരട്ടിയാക്കി. ഇതിനു ശേഷമായിരുന്നു ഗോകുലം കേരള ഗോള് മടക്കിയത്.
45ാം മിനുട്ടില് നൗഫലിന്റെ ഗോള് ഗോകുലത്തെ കളിയിലേക്ക് തിരികെ എത്തിക്കുകയായിരുന്നു. 65ാം മിനിട്ടില് കൃഷ്ണയുടെ ഗോളോടെ ഗോകുലം കേരള സമനില കണ്ടെത്തി. കളി സമനിലയിലേക്ക് പോകവെ ഇഞ്ച്വറി ടൈമില് ലാല്ഹസംഗയിലൂടെ മൊഹമ്മദന്സ് വിജയ ഗോള് നേടി.
ജയത്തോടെ മൊഹമ്മദന്സ് ലീഗില് 38 പോയിന്റുമായി ഒന്നാമതായി. ഗോകുലം 32 പോയിന്റുമായി മൂന്നാമതാണ്.
പ്രതികരിക്കാൻ ഇവിടെ എഴുതുക: