വയനാട്: പൂക്കോട് വെറ്റിനറി സർവകലാശാലയിൽ എസ് എഫ് ഐയുടെ ആൾക്കൂട്ട വിചാരണയെയും മർദനത്തേയും തുടർന്ന് മരിച്ച സിദ്ധാർഥിന്റെ വീടിന് മുന്നിൽ സിപിഎം സ്ഥാപിച്ച ബോർഡ് എടുത്തു മാറ്റി. സിദ്ധാര്‍ത്ഥ് എസ്എഫ്ഐ പ്രവര്‍ത്തകനെന്ന് ചൂണ്ടിക്കാട്ടിയുള്ള ഫ്ളക്സ് സിപിഎം പ്രാദേശിക നേതൃത്വമാണ് സ്ഥാപിച്ചത്.
‘എസ്എഫ്ഐ പ്രവർത്തകൻ സിദ്ധാർത്ഥനെ കൊന്നവരെ നിയമത്തിനു മുന്നിൽ കൊണ്ട് വരിക’ എന്നായിരുന്നു ഫ്ലെക്സ് ബോർഡിലുണ്ടായിരുന്നത്. സിപിഎമ്മിന്റെയും ഡിവൈഎഫ്‌ഐയുടെയും പേരിലായിരുന്നു ഫ്ളക്സ് ഉണ്ടായിരുന്നത്. പുകമറ സൃഷ്ടിച്ച് കേസിനെ വഴിതിരിച്ചുവിടാനായിരുന്നു സിദ്ധാർത്ഥിന്റെ വീടിനു മുന്നിൽ ഫ്ലക്സ് ബോർഡ് സ്ഥാപിച്ചത്. ഇതിനെതിരെ കുടുംബവും നാട്ടുകാരും പ്രതിഷേധവുമായി രംഗത്ത് എത്തുകയായിരുന്നു.
വെറ്ററിനറി രണ്ടാം വര്‍ഷ വിദ്യാര്‍ത്ഥി സിദ്ധാര്‍ത്ഥ് എസ്എഫ്ഐ പ്രവര്‍ത്തകനാണെന്നും കുറക്കോട് വിനോദ്‌നഗര്‍ നിവാസിയായ സിദ്ധാര്‍ത്ഥിന്റെ കൊലപാതകത്തില്‍ ഉള്‍പ്പെട്ട മുഴുവന്‍ ക്രിമനലുകളെയും നിയമത്തിന് മുന്നില്‍ കൊണ്ടുവരിക. കൃത്യമായ അന്വേഷണം നടത്തി പ്രതികളെ അറസറ്റ് ചെയ്യുക. നീതിക്കായി എന്നും കുടുംബത്തോടൊപ്പം എന്നാണ് ബോര്‍ഡിലെ വാചകം.
ഇതുകണ്ട് തങ്ങളുടെ വീടിനുമുന്നില്‍ സ്ഥാപിച്ചിട്ടുള്ള ബോര്‍ഡും അനുശോചനമറിയിച്ചുകൊണ്ടുളള എല്ലാബോര്‍ഡുകളും മാറ്റണമെന്ന ആവശ്യവുമായി സിദ്ധാര്‍ത്ഥിന്റെ കുടുംബം രംഗത്ത് എത്തി. മൂന്നൂ ദിവസംവരെ ഒരിറ്റുവെളളംപോലും കൊടുക്കാതെ എസ്എഫ്ഐ നേതാക്കള്‍ സിദ്ധാര്‍ത്ഥിനെ മുറിക്കുള്ളില്‍ പൂട്ടിയിട്ട് കൊടിയ മര്‍ദനം ഏല്‍പ്പിച്ച് കൊലപ്പെടുത്തിയശേഷം ഇത്തരം നാടകങ്ങളുമായി പ്രതികളെ സംരക്ഷിക്കാന്‍ ഇറങ്ങിത്തിരിച്ചിരിക്കുകയാണെന്ന് അവര്‍ കുറ്റപ്പെടുത്തി.
വിമർശനങ്ങൾക്കിടെ കെഎസ്‍യു അവരുടെ ഫ്ലെക്സ് ബോർഡുമായി എത്തി. “എസ്എഫ്ഐ കൊന്നതാണ്” എന്നെഴുതിയ ബോർഡാണ് കെഎസ്‍യു സ്ഥാപിച്ചത്.
പ്രതികരിക്കാൻ ഇവിടെ എഴുതുക: