തൊടുപുഴ: മണക്കാട് പ്രീമെട്രിക് ട്രൈബല്‍ ബോയ്‌സ് ഹോസ്റ്റലിലെ കുട്ടികളെ ലൈംഗികമായി പീഡിപ്പിച്ച വാര്‍ഡന്‍ പിടിയില്‍. കൊല്ലം പാവുമ്പ മണപ്പിള്ളി രാജീവ് ഭവനില്‍ രാജീവി (41) നെയാണ് തൊടുപുഴ പോലീസ് ഇന്നലെ അറസ്റ്റ് ചെയ്തത്.
ഹോസ്റ്റലിലെ അഞ്ച് കുട്ടികള്‍ക്കാണ് മോശം അനുഭവം ഉണ്ടായതെന്ന് പോലീസ് പറഞ്ഞു. ജനുവരി 26ന് ആണ് കേസിന് ആസ്പദമായ സംഭവം. ഇതിന് മുമ്പും ഇത്തരം അനുഭവം ഉണ്ടായിട്ടുണ്ടെന്ന് സൂചനയുണ്ട്. 6 വര്‍ഷക്കാലമായി പ്രതി ഹോസ്റ്റലില്‍ ജോലി ചെയതുവരികയാണ്.
പീഡന വിവരം കുട്ടികള്‍ ഹോസ്റ്റലിലെ മറ്റ് ജീവനക്കാരെയാണ് അറിയിച്ചത്. ഇവര്‍ സംയോജിത പട്ടികവര്‍ഗ വികസന വകുപ്പ് പ്രോജക്ട് ഓഫീസറെ അറിയിച്ചു. ഇവിടെ നിന്ന് 29ന് വൈകിട്ടാണ് പോലീസിന് വിവരം ലഭിക്കുന്നത്. 30ന് രാവിലെ തൊടുപുഴ മണക്കാട് റോഡില്‍ വാടകയ്‌ക്ക് താമസിക്കുന്ന വീട്ടില്‍ നിന്ന് രാജീവിനെ കസ്റ്റഡിയിലെടുത്തു.
കൂടുതല്‍ കുട്ടികളെ ഇയാള്‍ ഉപദ്രവിച്ചിട്ടുണ്ടോയെന്ന് കൗണ്‍സലിങ്ങിന് ശേഷമേ വ്യക്തമാകൂവെന്ന് പോലീസ് പറഞ്ഞു. കുട്ടികളെ വൈദ്യപരിശോധനക്ക് ശേഷം മജിസ്‌ട്രേറ്റിന് മുന്നില്‍ ഹാജരാക്കി മൊഴി രേഖപ്പെടുത്തി. പ്രതി ഭയപ്പെടുത്തിയിരുന്നതിനാല്‍ കുട്ടികള്‍ കൂടുതല്‍ വിവരങ്ങള്‍ പറയാന്‍ മടിച്ചതായി പോലീസ് പറഞ്ഞു. ഏറെ സമയമെടുത്താണ് കുട്ടികളില്‍ നിന്ന് പോലീസ് വിവരങ്ങള്‍ ചോദിച്ചറിഞ്ഞത്. 62 കുട്ടികളാണ് ആകെ ഹോസ്റ്റലിലുള്ളത്. ഹൈറേഞ്ചില്‍ നിന്നടക്കം എത്തുന്ന ഇവര്‍ വിവിധ സ്‌കൂളുകളിലായാണ് പഠിക്കുന്നത്. പ്രതിയെ വൈദ്യപരിശോധനക്ക് ശേഷം കോടതിയില്‍ ഹാജരാക്കി.
പ്രതികരിക്കാൻ ഇവിടെ എഴുതുക: