ഹൈദരാബാദ്: രാമോജി ഫിലിം സിറ്റിയില്‍ യുഎസ് സോഫ്റ്റ്വെയര്‍ കമ്പനിയുടെ രജതജൂബിലി ആഘോഷങ്ങള്‍ക്കിടെ സ്റ്റേജിലുണ്ടായ അപകടത്തില്‍ സിഇഒ മരിച്ചു. സിഇഒ സഞ്ജയ് ഷായാണ് (56) മരിച്ചത്.
കമ്പനിയുടെ പ്രസിഡന്റ് രാജു ദറ്റ്ലയെ ഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചു. സില്‍വര്‍ ജൂബിലി ആഘോഷത്തിന്റെ തുടക്കത്തില്‍ ഇരുവരെയും ഇരുമ്പു കൂടിനുള്ളില്‍ 25 അടി ഉയരത്തില്‍ നിന്ന് സ്റ്റേജിലേക്ക് ഇറക്കുന്നതിനിടെയാണ് അപകടമുണ്ടായത്. ഒരുവശത്തെ ഇരുമ്പ് കയര്‍ പൊട്ടിയതോടെ ഇരുമ്പ് കൂട് ചരിയുകയും 15 അടി ഉയരത്തില്‍നിന്ന് ഇരുവരും അതിവേഗത്തില്‍ ശക്തിയായി കോണ്‍ക്രീറ്റ് സ്റ്റേജിലേക്കു വീഴുകയുമായിരുന്നു. ഇവരെ ഉടന്‍ ആശുപത്രിയില്‍ എത്തിച്ചെങ്കിലും സഞ്ജയ് ഷായെ രക്ഷിക്കാനായില്ല. രാജു ദറ്റ്ലയുടെ നില ഗുരുതരമാണ്.
അപകടത്തിന്റെ വീഡിയോ സമൂഹ മാധ്യമങ്ങളില്‍ പ്രചരിച്ചിരുന്നു. കമ്പനിയിലെ എഴുനൂറോളം ജീവനക്കാര്‍ ചടങ്ങില്‍ പങ്കെടുത്തിരുന്നു. രജതജൂബിലി ആഘോഷങ്ങളില്‍ കുടുംബത്തോടൊപ്പമാണ് സഞ്ജയ് ഷാ എത്തിയത്. 1999ലാണ് യുഎസ് ആസ്ഥാനമായി ഷാ കമ്പനി ആരംഭിക്കുന്നത്. 2000മുതല്‍ ദറ്റ്‌ല കമ്പനിയുടെ പ്രധാനചുമതല വഹിച്ചുവരുന്നു. വിവിധ രാജ്യങ്ങളിലായി 20 ഓഫീസുകളും 20,000 ജീവനക്കാരുമുണ്ട്.
അപകടത്തെത്തുടര്‍ന്ന് കമ്പനി ഉദ്യോഗസ്ഥന്‍ നല്‍കിയ പരാതിയുടെ അടിസ്ഥാനത്തില്‍ രാമോജി ഫിലിം സിറ്റി ഇവന്റ് മാനേജ്മെന്റ് അധികൃതര്‍ക്കെതിരെ വിവിധ വകുപ്പുകള്‍ പ്രകാരം കേസെടുത്തു. സംഭവവുമായി ബന്ധപ്പെട്ട് കൂടുതല്‍ അന്വേഷണം നടന്നുവരികയാണ്.
പ്രതികരിക്കാൻ ഇവിടെ എഴുതുക: