ന്യൂദല്‍ഹി: പൗരത്വ ഭേദഗതി നിയമത്തിന്റെ അന്തിമ കരട് മാര്‍ച്ച് 30നകം പൂര്‍ത്തിയാകുമെന്ന് കേന്ദ്ര ആഭ്യന്തര സഹമന്ത്രി അജയ്കുമാര്‍ മിശ്ര. ബംഗാളിലെ നോര്‍ത്ത് 24 പര്‍ഗാനാസില്‍ മറ്റുവ സമൂഹത്തെ അഭിസംബോധന ചെയ്യുകയായിരുന്നു അദ്ദേഹം.
സിഎഎ പാസാക്കിയപ്പോള്‍ നിരവധി പേര്‍ കുപ്രചാരണം നടത്തി. ചിലര്‍ സുപ്രീം കോടതിയെ സമീപിച്ചു. സിഎഎയ്‌ക്കെതിരായി 220 ഹര്‍ജികള്‍ സമര്‍പ്പിച്ചിട്ടുണ്ട്. സിഎഎ നിയമം ഉണ്ടാക്കാന്‍ പോകുകയാണ്. നിയമം ഉയര്‍ത്തിപ്പിടിക്കാന്‍ സുപ്രീംകോടതി വരെ പോകും. ഞങ്ങളുടെ വാഗ്ദാനമാണ്. സിഎഎ തീര്‍ച്ചയായും നടപ്പാക്കും. മാറ്റുവ സമുദായത്തിന്റെ അവകാശങ്ങള്‍ തട്ടിയെടുക്കാന്‍ ആര്‍ക്കും കഴിയില്ല. മാറ്റുവ സമുദായത്തിന്റെ അവകാശങ്ങള്‍ സംരക്ഷിക്കപ്പെടുമെന്നും കേന്ദ്രമന്ത്രി ഉറപ്പ് നല്കി.
കഴിഞ്ഞ രണ്ടു വര്‍ഷമായി പൗരത്വ ഭേദഗതി നിയമം നടപ്പാക്കുന്നതിനുള്ള നടപടികള്‍ സ്വീകരിക്കുന്നു. 2019 ഡിസംബറില്‍ ബില്‍ ഇരുസഭകളിലും പാസാക്കി. 2020 ജനുവരി 10ന് നിയമം പ്രാബല്യത്തില്‍ വന്നു. നിയമം നടപ്പാക്കുന്നതിനായി ചട്ടം തയാറാക്കണം. ലോക്‌സഭയ്‌ക്ക് 2024 ജനുവരി ഒന്‍പത് വരെയും രാജ്യസഭാ സമിതിക്ക് മാര്‍ച്ച് 30 വരെയും നിയമം രൂപീകരിക്കാന്‍ സമയപരിധിയുണ്ടെന്നും മിശ്ര പറഞ്ഞു.
പാകിസ്ഥാന്‍, ബംഗ്ലാദേശ്, അഫ്ഗാനിസ്ഥാന്‍ എന്നീ രാജ്യങ്ങളില്‍ നിന്ന് 2014 ഡിസംബര്‍ 31ന് മുമ്പായി ഭാരതത്തിലേക്ക് കുടിയേറിയ ഹിന്ദു, സിഖ്, ജൈന, ബുദ്ധ, പാഴ്‌സി, ക്രിസ്ത്യന്‍ മതവിശ്വാസികളായിട്ടുള്ളവര്‍ക്ക് ഭാരത പൗരത്വം നല്കുന്നതാണ് പൗരത്വ ഭേദഗതി നിയമം.
പ്രതികരിക്കാൻ ഇവിടെ എഴുതുക: