മകനെ കൊലപ്പെടുത്തിയ ശേഷം ജീവനൊടുക്കി; ഫിനാൻസുകാരുടെ ശല്യത്തെ തുടർന്നെന്ന് ആത്മഹത്യക്കുറിപ്പ്

കോട്ടയം: മീനടത്ത് അച്ഛനെയും മകനെയും മരിച്ച നിലയിൽ കണ്ടെത്തിയ സംഭവത്തിൽ ഫിനാൻസുകാർ വിളിച്ച് ശല്യപ്പെടുത്തിയിരുന്നതായി ആത്മഹത്യാക്കുറിപ്പ്. പ്രഭാത സവാരിക്ക് പോയ അച്ഛനെയും മകനെയും ആൾ താമസമില്ലാത്ത വീടിന്റെ വിറകുപുരയിൽ തൂങ്ങി മരിച്ച നിലയിൽ കണ്ടെത്തുകയായിരുന്നു.

മീനടം സ്വദേശി വിഎം ബിനുമോൻ എന്നയാളും ഇയാളുടെ മകൻ ശിവഹരിയുമാണ് മരിച്ചത്. ഇന്നലെ രാവിലെ ഏഴരയോടെയായിരുന്നു സംഭവം. സ്വകാര്യ പണമിടപാട് സ്ഥാപനത്തിൽ നിന്ന് വിളിച്ച് ശല്യപ്പെടുത്തിയിരുന്നതായി ബിനുവിന്റെ ആത്മഹത്യാക്കുറിപ്പിൽ ഉണ്ടെന്ന് പോലീസ് പറയുന്നു.

വയറിംഗ് ജോലികൾ ചെയ്യുന്ന ആളാണ് ബിനു. മീനടത്ത് സ്ഥലം വാങ്ങി വീടുവച്ചിട്ട് 10 വർഷത്തോളമായി. കടബാദ്ധ്യതയെക്കുറിച്ച് വീട്ടുകാർക്ക് അറിവില്ല. മകനെ കൊലപ്പെടുത്തിയ ശേഷം ബിനു ആത്മഹത്യ ചെയ്യുകയായിരുന്നുവെന്നാണ് പോലീസിന്റെ പ്രാഥമിക നിഗമനം.