ലഖ്‌നൗ: ലോകകപ്പില്‍ ബംഗ്ലാദേശിനെതിരായ മത്സരത്തിനിടെ പരിക്കേറ്റ ഓള്‍ റൗണ്ടര്‍ ഹാര്‍ദിക് പാണ്ഡ്യക്ക് കൂടുതല്‍ മത്സരങ്ങള്‍ നഷ്ടമാകുമെന്ന് സൂചന. പരിക്കുമൂലം ന്യൂസിലന്‍ഡിനെതിരായ മത്സരം നഷ്ടമായ ഹാര്‍ദിക്കിന് ഇന്ത്യയുടെ അടുത്ത രണ്ട് മത്സരങ്ങള്‍ കൂടി നഷ്ടമാകുമെന്നാണ് പുതിയ റിപ്പോര്‍ട്ടുകള്‍ പറയുന്നത്.
ഇതോടെ ഹാര്‍ദിക്കിന് 29ന് ലഖ്‌നൗവില്‍ നടക്കുന്ന ഇംഗ്ലണ്ടിനെതിരായ മത്സരവും അടുത്ത മാസം രണ്ടിന് മുംബൈ വാംഖഡെയില്‍ ശ്രീലങ്കക്കെതിരായ മത്സരവും നഷ്ടമാകും. അഞ്ചിന് കൊല്‍ക്കത്ത ഈഡന്‍ഗാര്‍ഡന്‍സില്‍ നടക്കുന്ന ദക്ഷിണാഫ്രിക്കക്കെതിരായ മത്സരത്തിലെ ഹാര്‍ദ്ദിക്കിന്റെ മടങ്ങിവരവുണ്ടാകു എന്നാണ് കരുതുന്നത്. ബംഗ്ലാദേശിനെതിരായ മത്സരത്തില്‍ സ്വന്തം ബൗളിംഗില്‍ പന്ത് ഫീല്‍ഡ് ചെയ്യാന്‍ ശ്രമിക്കുന്നതിനിടെയാണ് ഹാര്‍ദിക്കിന്റെ ഇടത് കണങ്കാലില്‍ പരിക്കേറ്റത്.
പരിക്കില്‍ നിന്ന് മുക്തനാവാനായി നിലവില്‍ ബെംഗളൂരുവിലെ ദേശീയ ക്രിക്കറ്റ് അക്കാദമിയില്‍ ബിസിസിഐ മെഡിക്കല്‍ സംഘത്തിന്റെ ചികിത്സയില്‍ കഴിയുകയാണ് ഹാര്‍ദ്ദിക് ഇപ്പോള്‍. ഇംഗ്ലണ്ടിനെതിരെ ഹാര്‍ദിക് ബാറ്ററായി കളിക്കാന്‍ സാധ്യതയുണ്ടെന്ന് നേരത്തെ റിപ്പോര്‍ട്ടുകള്‍ വന്നിരുന്നു. എന്നാല്‍ ഇതിന് സാധ്യതയില്ലെന്നാണ് പുതിയ റിപ്പോര്‍ട്ടുകള്‍ സുചിപ്പിക്കുന്നത്.
പ്രതികരിക്കാൻ ഇവിടെ എഴുതുക: