കൊലചെയ്യപ്പെട്ട മനുഷ്യനാണ്
ആരോ വെട്ടിക്കളഞ്ഞ മരത്തിന്റെ
ആസ്ഥാന വേരില്‍
സ്വസ്ഥമായി ഇരിക്കുന്നത്!
ഉന്മൂലനം ചെയ്ത വിത്താണ്
എന്നോ വിണ്ടുകീറിയ
ഭൂമിയുടെ തലയില്‍
തണലേകി നില്‍ക്കുന്നത്.
അജ്ഞാതമായ അശരീരിയാണ്
തകര്‍ത്തു കളഞ്ഞ
അടിയാള വീണയുടെ തന്തിയില്‍
സപ്തസ്വരങ്ങള്‍ പെയ്യിക്കുന്നത്.
പൊട്ടിപ്പൊടിഞ്ഞ ശിലയാണ്
ശില്‍പ്പങ്ങളുടെ രാജാവായി
ഉളിയും ചുറ്റികയും കാണാതെ
കണ്‍മുന്നില്‍ പ്രത്യക്ഷപ്പെടുന്നത്.
തുന്നിച്ചേര്‍ക്കാതെ പഞ്ഞിച്ചേലയാണ്
വിശ്വസൗന്ദര്യം വിളിച്ചു പറയുന്ന
കടലും കരയും വയലും മലയും
ഞൊറിഞ്ഞുടുത്തിരിക്കുന്നത്.
വറ്റിപ്പോയ തീര്‍ത്ഥജലത്തില്‍ നിന്ന്
ഒരിറ്റുമൊത്തിക്കുടിക്കുമ്പോള്‍
സത്യം പറയട്ടെ:
ദാഹമുറഞ്ഞ എന്റെ നാവില്‍
നടനം ചെയ്യാന്‍ മാത്രമാണ്
ആരും പഠിപ്പിക്കാത്ത
ആത്മവിദ്യാലയത്തിലെ
അസംഖ്യം അനാഥഗീതങ്ങള്‍.
അവ എവിടെ നൊന്തു
പിറന്നുവെന്നറിയാന്‍
ചിതല്‍പ്പുറ്റു തോണ്ടിയെടുത്ത
പാപ മോചനത്തിന്റെ
വാത്മീകിപ്പക്ഷിയെ
ആകാശത്തേക്ക് പറത്തിവിട്ടാല്‍
മാത്രം മതി!
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: