യുവാക്കളുടെ മരണം; സ്ഥലം ഉടമ അനന്തകുമാർ റിമാൻഡിൽ

പാലക്കാട്: കരിങ്കരപ്പുള്ളിയിലെ യുവാക്കളുടെ മരണത്തെ തുടർന്ന് അറസ്റ്റ് ചെയ്ത സ്ഥലം ഉടമയെ റിമാൻഡ് ചെയ്തു. സ്ഥലം ഉടമ അനന്തകുമാറിനെ 14 ദിവസത്തേക്കാണ് റിമാൻഡ് ചെയ്തത്. ഇന്നലെ ഉച്ചയ്‌ക്ക് 12 മണിയോടെയാണ് അനന്തകുമാറിന്റെ അറസ്റ്റ് രേഖപ്പെടുത്തിയത്. ഇന്നലെ രാത്രിയാണ് പ്രതിയെ മജിസ്‌ട്രേറ്റിന് മുന്നിൽ ഹാജരാക്കിയത്.

തെളിവെടുപ്പിൽ ഇയാൾ ഒളിപ്പിച്ച വൈദ്യുതി വേലി ഉൾപ്പെടെയുള്ള വസ്തുക്കൾ കണ്ടെത്തിയിരുന്നു. നരഹത്യ, തെളിവ് നശിപ്പിക്കൽ, വൈദ്യുതി മോഷണം എന്നീ വകുപ്പുകൾ ചുമത്തിയാണ് കേസ് രജിസ്റ്റർ ചെയ്തിട്ടുള്ളത്. തിങ്കളാഴ്ച പുലർച്ചെ 4.52-നാണ് വയൽ പ്രദേശത്തേക്ക് യുവാക്കൾ എത്തുന്നത്.

അടിപിടിക്കേസുമായി ബന്ധപ്പെട്ട് ഓടി രക്ഷപ്പെട്ട് വയലിലേക്ക് എത്തുകയായിരുന്നു. നാല് പേരാണ് ഇവിടെ എത്തിയത്. കൂടെ ഉണ്ടായിരുന്ന സതീഷൻ, ഷിജിത്ത് എന്നവിരെ കാണാനില്ലെന്ന് മറ്റ് രണ്ട് പേരാണ് പോലീസിനോട് പറഞ്ഞത്. തുടർന്ന് നടത്തിയ അന്വേഷണത്തിലാണ് മൃതദേഹങ്ങൾ പാടത്ത് കുഴിച്ചിട്ട നിലയിൽ കണ്ടെത്തിയത്.