തിരുവനന്തപുരം: പൂജപ്പുര സെന്‍ട്രല്‍ ജയിലിലെ തടവുകാരനില്‍നിന്ന് ഫോണ്‍ പിടിച്ചെടുത്തതിന് പിന്നാലെ ഡെപ്യൂട്ടി പ്രിസണ്‍ ഓഫീസര്‍ക്ക് സസ്‌പെന്‍ഷന്‍. തടവുകാരനില്‍ നിന്ന് പിടിച്ചെടുത്ത മൊബൈലിലേക്ക് ജയില്‍ ഉദ്യോഗസ്ഥരുടെ ഫോണ്‍ വിളി നിരന്തരം വന്നതുമായി ബന്ധപ്പെട്ടാണ് ഡപ്യൂട്ടി പ്രിസണ്‍ ഓഫീസര്‍ സന്തോഷ് കുമാറിനെ സസ്‌പെന്‍ഡ് ചെയ്തത്.
സെന്‍ട്രല്‍ ജയിലില്‍ ജോലിചെയ്തിരുന്ന സന്തോഷ് കുമാറിനെ ഒരു മാസം മുന്‍പാണ് പൂജപ്പുര കുഞ്ചാലൂംമൂടിലെ സബ് ജയിലിലേക്ക് മാറ്റിയത്. സന്തോഷിന്റെ ഫോണില്‍നിന്നാണ് അവസാനം ഫോണ്‍ വിളിയെത്തിയത്. ഈ ഓഫീസറുടെ ഭാര്യയുടെ അക്കൗണ്ടിലേക്ക് ലഹരിമാഫിയ സംഘാംഗത്തിന്റെ അക്കൗണ്ടില്‍നിന്ന് പണം വന്നിരുന്നുവെന്നു കണ്ടെത്തിയിരുന്നു.
കഴിഞ്ഞ മാസം 27-നാണ് സംഭവം. ഒന്നാം ബ്ലോക്കില്‍ ആറാമത്തെ മുറിയില്‍നിന്നു ഫോണും 2 സിം കാര്‍ഡും ലഭിക്കുന്നത്. ഇതു ജയില്‍ സൂപ്രണ്ട് പൂജപ്പുര പോലീസിന് കൈമാറി. ഈ ഫോണ്‍ പോലീസിന്റെ കയ്യില്‍ ഇരിക്കുമ്പോള്‍ത്തന്നെ ഇതിലേക്കു ജയില്‍ ഉദ്യോഗസ്ഥരുടെ വിളിയെത്തി. സന്തോഷിന്റെ ഭാര്യയുടെ ഫോണില്‍നിന്നു വന്ന വിളികള്‍ നിരീക്ഷിച്ചപ്പോഴാണ് ഇവരുടെ ബാങ്ക് അക്കൗണ്ടിലേക്കു ലഹരിസംഘത്തിലൊരാളുടെ അക്കൗണ്ടില്‍നിന്നു പണം വന്ന വിവരം ലഭിച്ചത്. ഇതിന് പിന്നാലെയാണ് ഉദ്യോഗസ്ഥന്റെ വഴിവിട്ട ഇടപാടുകള്‍ കണ്ടെത്തി സസ്‌പെന്‍ഡ് ചെയ്തത്.
പ്രതികരിക്കാൻ ഇവിടെ എഴുതുക: