പുതുക്കാട്: തലോര്‍ ദേശീയപാതയോരത്ത് രാത്രിയില്‍ വന്‍തോതില്‍ കക്കൂസ് മാലിന്യം തള്ളുന്ന സംഘത്തെ പുതുക്കാട് പോലീസ് പിടികൂടി. പത്തനംതിട്ട കോഴഞ്ചേരി നാരങ്ങാനം നെടിയപറമ്പില്‍ ഷിബു (43), പാലക്കാട് എരിമയൂര്‍ ചുള്ളിമട കൃഷ്ണദാസ് (32) എന്നിവരെയാണ് പോലീസിന്റെ നൈറ്റ് പട്രോളിങ് സംഘം അറസ്റ്റ് ചെയ്തത്.
രണ്ട് ടാങ്കര്‍ ലോറികളും സംഘത്തിന് അകമ്പടി വന്നിരുന്ന മൂന്ന് ബൈക്കുകളും പോലീസ് പിടിച്ചെടുത്തു. ബൈക്കിലുണ്ടായിരുന്നവര്‍ ഓടി രക്ഷപ്പെട്ടു. തലോര്‍ മേല്‍പ്പാലത്തിന് സമീപം കക്കുസ് മാലിന്യം തള്ളുന്നതിനിടെയാണ് സംഘം പോലീസിന്റെ പിടിയിലായത്. സംഘത്തില്‍പ്പെട്ടവര്‍ മൂന്ന് ബൈക്കുകളിലായി തങ്ങളുടെ നീക്കങ്ങള്‍ നിരീക്ഷിച്ചിരുന്നുവെന്ന് പോലീസ് പറഞ്ഞു.
ഇവിടെ സ്ഥിരമായി മാലിന്യം തള്ളുന്നുവെന്ന പരാതിയെ തുടര്‍ന്ന് മേഖലയില്‍ പോലീസ് നിരീക്ഷണം ശക്തമാക്കിയിരുന്നു. പോലീസിനെ കണ്ട് രക്ഷപ്പെടാന്‍ ശ്രമിച്ച സംഘത്തെ പിന്തുടര്‍ന്ന് പിടികൂടുകയായിരുന്നു. പുതുക്കാട് പോലീസ് എസ്എച്ച്ഒ യു.എച്ച്. സുനില്‍ദാസ്, എസ്.ഐ. ശ്രീനി, സിപിഒമാരായ അമല്‍രാജ്, സിനേഷ് എന്നിവരുടെ നേതൃത്വത്തിലായിരുന്നു അറസ്റ്റ്.
പ്രതികരിക്കാൻ ഇവിടെ എഴുതുക: