പുത്തൂര്‍: പുത്തൂര്‍ സമീപവാസികള്‍ ശുദ്ധജലത്തിനായി ആശ്രയിച്ചിരുന്ന പൊതുകിണര്‍, വീട് നിര്‍മാണത്തിന്റെ ഭാഗമായി നികത്തിയതായി പരാതി. സിപിഎം മാവടി ലോക്കല്‍ കമ്മിറ്റിയംഗം കുളക്കട കിഴക്ക് പുളിവിളയില്‍ രാധാകൃഷ്ണന് എതിരെയാണ് നാട്ടുകാര്‍ പഞ്ചായത്തില്‍ പരാതി നല്‍കിയത്.
പാര്‍ട്ടി തലത്തില്‍ നടപടി സ്വീകരിക്കണം എന്നാവശ്യപ്പെട്ട് സിപിഎം ലോക്കല്‍ കമ്മിറ്റിക്കും പരാതി നല്‍കിയിട്ടുണ്ട്. പൊതുകുറ്റം വാര്‍ഡിലെ പറങ്കിമാംവിള കാട്ടുപുറത്ത് ഭാഗത്ത് കാലങ്ങളായി ഉണ്ടായിരുന്ന കിണറാണ് പുതിയ വീടിന്റെ നിര്‍മാണവുമായി ബന്ധപ്പെട്ടു നികത്തിയതെന്നു പരാതിയില്‍ പറയുന്നു.
പതിനഞ്ചോളം കുടുംബങ്ങള്‍ ആശ്രയിച്ചിരുന്ന കിണറായിരുന്നു നികത്തിയത്. സംഭവത്തില്‍ അന്വേഷണം നടത്തണമെന്നും ഇതേ സ്ഥലത്ത് പുതിയ പൊതുകിണര്‍ നിര്‍മിക്കണം എന്നുമാണ് പരാതിക്കാരുടെ ആവശ്യം. സംഭവസ്ഥലം സന്ദര്‍ശിച്ചതായും ഒരു പൊതുകിണര്‍ അവിടെ ഉണ്ടായിരുന്നതായി ബോധ്യപ്പെട്ടതായും പഞ്ചായത്ത് സെക്രട്ടറി അറിയിച്ചു.
പ്രതികരിക്കാൻ ഇവിടെ എഴുതുക: