ന്യുദല്‍ഹി: വളര്‍ത്തുനായ തുടര്‍ച്ചയായി കുരയ്‌ക്കുന്നതിനെ തുടര്‍ന്നുണ്ടായ തര്‍ക്കത്തിനിടെ നായയുടെ ഉടമയെ 17 കാരന്‍ തല്ലിക്കൊന്നു. ദല്‍ഹി നജഫ്ഘട്ടിലാണ് സംഭവം. പ്രദേശവാസിയായ അശോക് കുമാറിനെ (85)ആണ് 17കാരന്‍ ഇരുമ്പ് വടി കൊണ്ട് അടിച്ച് കൊലപ്പെടുത്തിയത്. വെള്ളിയാഴ്ചയായിരുന്നു സംഭവം.
അശോക് കുമാറിന്റെ വളര്‍ത്തുനായ തുടര്‍ച്ചയായി കുരച്ചിരുന്നു. ഇതില്‍ പ്രകോപിതനായാണ് 17-കാരന്‍ ആക്രമണം നടത്തിയത്. നായയുടെ കുര കേട്ട് അശോകിന്റെ വീട്ടിലെത്തിയ പ്രതി ആദ്യം നായയെയാണ് ആക്രമിച്ചത്. ഇതു കണ്ടെത്തിയ അശോക് കുമാര്‍ പ്രതിയെ തടയാന്‍ ശ്രമിച്ചു. തുടര്‍ന്ന് ഇരുവരും തമ്മില്‍ തര്‍ക്കമായി. ഇതിനിടെ 17 കാരന്‍ ഇരുമ്പ് വടി കൊണ്ട് അശോക് കുമാറിനെ മര്‍ദ്ദിച്ചുവെന്ന് അശോകിന്റെ ഭാര്യ മീന മൊഴി നല്‍കി. മര്‍ദ്ദനമേറ്റ അശോക് ബോധരഹിതനായി വീണു. തുടര്‍ന്ന് എല്ലാവരും ചേര്‍ന്ന് അശോകിനെ ആശുപത്രിയിലെത്തിച്ചു. ചികിത്സയിലിരിക്കെ ഞായറാഴ്ചയാണ് അദ്ദേഹം മരിച്ചത്.
സംഭവത്തില്‍ 17കാരനെതിരെ കൊലപാതകക്കുറ്റം ചുമത്തി കേസെടുത്തിട്ടുണ്ടെന്ന് പോലീസ് അറിയിച്ചു. ഒളിവില്‍ പോയ പ്രതിയെ പിടികൂടാനുള്ള ശ്രമങ്ങള്‍ തുടരുകയാണ്.
പ്രതികരിക്കാൻ ഇവിടെ എഴുതുക: