കീവ് : റഷ്യന്‍ ഷെല്ലാക്രമണം തുടരുന്നതിനിടെ ഉക്രൈന്‍ പ്രസിഡന്റ് വ്ളാദിമിര് സെലന്‍സ്‌കിക്ക് നേരെ മൂന്ന് തവണ കൊലപാതക ശ്രമങ്ങളുണ്ടായെന്ന് വെളിപ്പെടുത്തല്‍. യുദ്ധം ആരംഭിച്ച ശേഷം തനിക്കു നേരെ മൂന്ന് തവണ കൊലപാതക ശ്രമങ്ങളുണ്ടായെന്ന് സെലന്‍സ്‌കി തന്നെയാണ് വെളിപ്പെടുത്തിയത്. റഷ്യയുടെ പ്രത്യേക ഏജന്റാണ് ഇതിന് പിന്നിലെന്നും ആരോപിക്കുന്നുണ്ട്.
റഷ്യയുടെ ഏജന്റുമാര്‍ തനിക്ക് നേരെ നടത്തിയ നീക്കം ഉക്രൈന്റെ സുരക്ഷാ ഭടന്മാര്‍ പരാജയപ്പെടുത്തിയെന്നാണ് സെലന്‍സ്‌കി അറിയിച്ചത്. ഉക്രൈന്‍ ദേശീയ സുരക്ഷാ പ്രതിരോധ വകുപ്പ് സെക്രട്ടറി ഈ മൂന്ന് കൊലപാതക ശ്രമങ്ങളും ഔദ്യോഗികമായി സ്ഥിരീകരിച്ചിട്ടുണ്ട്. ഉക്രൈനികളെ വംശഹത്യ ചെയ്യുന്ന ‘രക്തരൂക്ഷിതമായ ഈ യുദ്ധത്തില്‍ പങ്കെടുക്കാന്‍ ആഗ്രഹിക്കാത്ത’ ഇരട്ട ഏജന്റുമാരില്‍ നിന്നാണ് തനിക്ക് ഈ വിവരം ലഭിച്ചതെന്നും അദ്ദേഹം മാധ്യമങ്ങളോട് വെളിപ്പെടുത്തി.
സെലന്‍സ്‌കിക്ക് നേരെ റഷ്യയുടെ ഫെഡറല്‍ സെക്യൂരിറ്റി സര്‍വീസ് (എഫ്എസ്ബി) സംഘം നടത്തിയ ആക്രമണത്തെ ഉക്രൈന്‍ സൈനിക ഉദ്യോഗസ്ഥര്‍ പരാജയപ്പെടുത്തിയെന്നും ടൈംസും റിപ്പോര്‍ട്ട് ചെയ്തു. മോസ്‌കോയുടെ പിന്തുണയുള്ള വാഗ്‌നര്‍ ഗ്രൂപ്പിലെയും ചെചെന്‍ പ്രത്യേക സേനയിലെയും കൂലിപ്പടയാളികളെയാണ് ഉക്രൈന്‍ സെലെന്‍സ്‌കിയെ കൊല്ലാനായി പുടിന്‍ അയച്ചതെന്നാണ് ആരോപണം.
അതിനിടെ റഷ്യക്കും ഉക്രൈനുമിടയിലെ പ്രശ്‌നങ്ങള്‍ പരിഹരിക്കുന്നതിനായി മധ്യസ്ഥത വഹിക്കാമെന്ന് സൗദി അറേബ്യ അറിയിച്ചു. വ്യാഴാഴ്ച രാത്രിയില്‍ റഷ്യന്‍ പ്രസിഡന്റ് വ്ളാദിമിര് പുടിനും ഉക്രൈയിന്‍ പ്രസിഡന്റ് സെലെന്‍സ്‌കിയുമായി ഫോണിലൂടെ നടത്തിയ ചര്‍ച്ചകളുടെ അടിസ്ഥാനത്തില്‍ പ്രശ്‌ന പരിഹാരത്തിന് ശ്രമിക്കാമെന്ന് സൗദി കിരീടാവകാശിയും ഉപപ്രധാനമന്ത്രിയും പ്രതിരോധ മന്ത്രിയുമായ മുഹമ്മദ് ബിന്‍ സല്‍മാന്‍ രാജകുമാരന്‍ വാക്ക് നല്‍കിയിട്ടുണ്ട്. പ്രതിസന്ധി അവസാനിപ്പിക്കുന്നതിനും സുരക്ഷയും സ്ഥിരതയും കൈവരിക്കുന്നതിനുമുള്ള രാഷ്‌ട്രീയ പരിഹാരത്തിലേക്ക് നയിക്കുന്ന ശ്രമങ്ങളെ സൗദി അറേബ്യ പിന്തുണയ്‌ക്കുമെന്നും മുഹമ്മദ് ബിന്‍ സല്‍മാന്‍ പറഞ്ഞതായി സൗദി അറേബ്യയുടെ ഔദ്യോഗിക വാര്‍ത്ത ഏജന്‍സി റിപ്പോര്‍ട്ട് ചെയ്തിട്ടുണ്ട്.
പ്രതികരിക്കാൻ ഇവിടെ എഴുതുക: