മണ്ണാര്‍ക്കാട്: വൈദ്യപരിശോധനക്കിടെ പോലീസ് കസ്റ്റഡിയില്‍ നിന്നും കൈവിലങ്ങുമായി രക്ഷപ്പെട്ട മോഷണ കേസിലെ പ്രതി പിടിയില്‍. തെങ്കര കൈതച്ചിറ മഡോണ വീട്ടില്‍ ജിന്റോ (23)നെയാണ് അട്ടപ്പാടി കോട്ടത്തറയില്‍ നിന്നും പിടികൂടിയത്. മണ്ണാര്‍ക്കാട് നിന്നും രക്ഷപ്പെട്ട ഇയാള്‍ തൃശൂര്‍ മാളയിലെത്തുകയാ യിരുന്നു. ഇവിടെ നിന്നും സുഹൃത്തിന്റെ സഹായത്തോടെ വിലങ്ങ് അഴിച്ചുമാറ്റി എറണാകുളത്തും, മൂന്നാറിലുമെത്തിയതിന് ശേഷമാണ് അട്ടപ്പാടിയിലെത്തിയത്.
സിഐ പി.അജിത്ത് കുമാര്‍,എസ്ഐ കെ.ആര്‍. ജസ്റ്റിന്‍,പോലീസുകാരായ ഷഫീഖ്, റമീസ്, കമറുദ്ദീന്‍, സഹദ്, ദാമോദരന്‍,ജയകൃഷ്ണന്‍,ഷൗക്കത്ത് എന്നിവര ടങ്ങുന്ന സംഘമാണ് കോട്ടത്തറയിലെത്തി പ്രതിയെ പിടികൂടിയത്. പോലീസിനെ കണ്ട് രക്ഷപ്പെടാന്‍ ശ്രമിച്ച പ്രതിയെ സാഹസികമായാണ് കീഴടക്കിയതെന്ന് സിഐ പി.അജിത്ത് കുമാര്‍ അറിയിച്ചു.
കഴിഞ്ഞ മാസം 29ന് വൈകിട്ട് ആറരയോടെയാണ് ജിന്റോ കസ്റ്റഡിയില്‍ നിന്നും ചാടിപ്പോയത്. നഗരത്തിലെ ഒരു കടയില്‍ നിന്നും മൊബൈല്‍ ഫോണ്‍ മോഷണം പോയ സംഭവത്തിലാണ് ജിന്റോയെ പോലീസ് കസ്റ്റഡിയിലെടുത്തത്. ആശുപത്രിയില്‍ വൈദ്യപരിശോധനക്കായി ഒരു കൈയിലെ വിലങ്ങഴിച്ചപ്പോഴാണ് പോലീസിന് തള്ളിമാറ്റി ഇയാള്‍ കടന്നുകളഞ്ഞത്. ജിന്റോ എത്താന്‍ സാധ്യതയുള്ള കേന്ദ്രങ്ങളിലെല്ലാം പോലീസ് നിരീക്ഷണം ശക്തമാക്കിയിരുന്നു.
പ്രതികരിക്കാൻ ഇവിടെ എഴുതുക: