അഞ്ചല്‍: കോട്ടുക്കലില്‍ ആസിഡ് ആക്രമണത്തില്‍ യുവാവിന്റെ വലതു കണ്ണിനു കാഴ്ച നഷ്ടപ്പെട്ടു. മുഖത്തും ശരീരഭാഗങ്ങളിലും സാരമായി പൊള്ളലേറ്റു. ഗുരുതരമായി പരിക്കേറ്റ അഞ്ചല്‍ കോട്ടുക്കല്‍ ആലംങ്കോട് നന്ദുഭവനില്‍ വിപിനെ (25) തിരുവനന്തപുരം മെഡിക്കല്‍ കോളേജ് ആശുപത്രിയില്‍ തീവ്ര പരിചരണ വിഭാഗത്തില്‍ പ്രവേശിപ്പിച്ചു.
വിപിന്റെ മുഖത്ത് ആസിഡ് ഒഴിച്ച കോട്ടുക്കല്‍ ജയവിലാസത്തില്‍ ഉദയകുമാറി (45)നെ ഇന്നലെ രാത്രിയോടെ വീടിനു സമീപത്തുനിന്ന് കടയ്‌ക്കല്‍ പോലീസ് അറസ്റ്റ് ചെയ്തു. സുഹൃത്തുക്കളായ വിപിനും ഉദയനും തിങ്കളാഴ്ച ഉച്ചകഴിഞ്ഞ് മദ്യപിക്കുന്നതിനിടെ ഉണ്ടായ തര്‍ക്കത്തില്‍ വിപിന്‍, ഉദയകുമാറിനെ മര്‍ദിച്ചിരുന്നു. ഇതിന്റെ വൈരാഗ്യത്തില്‍ ഉദയകുമാര്‍ വീട്ടിലെത്തി റബര്‍ഷീറ്റിന് ഉപയോഗിച്ചിരുന്ന ആസിഡ് എടുത്തുകൊണ്ട് വന്ന് കോട്ടുക്കല്‍ ജംഗ്ഷനില്‍ നില്‍ക്കുകയായിരുന്ന വിപിന്റെ മുഖത്ത് ഒഴിക്കുകയായിരുന്നു.
നാട്ടുകാര്‍ വിപിനെ ആദ്യം അഞ്ചലിലെ സ്വകാര്യ ആശുപത്രിയിലും പിന്നീട് മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. വിപിന്റെ വലത് കണ്ണിന്റെ കാഴ്ച പൂര്‍ണമായും നഷ്ടപ്പെട്ട നിലയിലാണ്. സംഭവസ്ഥലത്ത് സയന്റിഫിക് ഉദ്യോഗസ്ഥരെത്തി തെളിവുകള്‍ ശേഖരിച്ചു. അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: