കൊച്ചി : പൃഥ്വിരാജിന്റെ സിനിമ കടുവയുടെ റിലീസിന് താത്കാലികമായി വിലക്ക്. സിനിമ പ്രക്ഷേപണം ചെയ്താല്‍ തനിക്കും കൂടുംബത്തിനും അപകീര്‍ത്തിയുണ്ടാകുമെന്നാരോപിച്ച് ജോസ് കുറുവിനാക്കുന്നേല്‍ നല്‍കിയ പരാതിയെ തുടര്‍ന്ന് എറണാകുളം സബ് കോടതിയാണ് സിനിമ പ്രദര്‍ശിപ്പിക്കുന്നത് താത്കാലികമായി വിലക്കിയിരിക്കുന്നത്.
ഹര്‍ജി തീര്‍പ്പാക്കും വരെ മലയാള സിനിമയായ കടുവ സിനിമ മുഴുവനായോ ഭാഗികമായോ പ്രദര്‍ശിപ്പിക്കുന്നതും തിരക്കഥ പ്രസിദ്ധീകരിക്കുന്നതും വിലക്കിയിട്ടുണ്ട്. സമൂഹമാധ്യമങ്ങളിലും ഒടിടിയിലും ഈ വിലക്ക് നിലനില്‍ക്കും. സിനിമക്കാധാരമായ ജിനു വി. എബ്രഹാമിന്റെ തിരക്കഥ പ്രസിദ്ധീകരിക്കുന്നതും കോടതി വിലക്കിയിട്ടുണ്ട്.
സിനിമയില്‍ പൃഥ്വിരാജ് അവതരിപ്പിക്കുന്ന കടുവാക്കുന്നേല്‍ കുറുവാച്ചന്‍ തന്റെ ജീവചരിത്രമാണെന്നും അത് പ്രദര്‍ശിപ്പിക്കുന്നത് തടയണമെന്നുമാണ് ജോസിന്റെ ഹര്‍ജിയില്‍ പറയുന്നത്. കേസ് വീണ്ടും ഈ മാസം 14 നു പരിഗണിക്കും.
ലിസ്റ്റിന്‍ സ്റ്റീഫന്റെ മാജിക് ഫ്രെയിംസും പൃഥ്വിരാജ് പ്രൊഡക്ഷന്‍സും സംയുക്തമായി നിര്‍മ്മിച്ച ചിത്രം ഷാജി കൈലാസിന്റെ തിരിച്ചുവരവ് സിനിമ കൂടിയാണ്. എട്ട് വര്‍ഷങ്ങള്‍ക്ക് ശേഷം ഷാജി കൈലാസ് സംവിധാനം ചെയ്യുന്ന ചിത്രമാണ് കടുവ. വരുന്ന ജനുവരിയില്‍ ചിത്രം റിലീസ് ചെയ്യാനാണ് തീരുമാനിച്ചിരിക്കുന്നത്. കേസ് വീണ്ടും ഈ മാസം 14ന് പരിഗണിക്കും.
പ്രതികരിക്കാൻ ഇവിടെ എഴുതുക: