തിരുവനന്തപുരം: ഒക്ടോബര്‍ രണ്ട് ഗാന്ധിജയന്തി ദിനത്തില്‍ ബിജെപി എല്ലാ ജില്ലാ കേന്ദ്രങ്ങളിലും ത്രിവര്‍ണ്ണ യാത്ര നടത്തും. സംസ്ഥാന അദ്ധ്യക്ഷന്‍ കെ.സുരേന്ദ്രന്‍ പാലക്കാട് ജില്ലയില്‍ യാത്ര നയിച്ച് പരിപാടിയുടെ സംസ്ഥാനതല ഉദ്ഘാടനം നിര്‍വഹിക്കും.
വൈകുന്നേരം മൂന്ന് മണിക്ക് പാലക്കാട് ശബരി ആശ്രമത്തില്‍ നിന്നും ആരംഭിക്കുന്ന ത്രിവര്‍ണ്ണ യാത്ര അകത്തേത്തറ പഞ്ചായത്ത് ഓഫീസിന് സമീപം സമാപിക്കും. സംസ്ഥാന ജനറല്‍ സെക്രട്ടറി സി.കൃഷ്ണകുമാറും പാലക്കാട് യാത്രയുടെ ഭാഗമാവും. കേന്ദ്രമന്ത്രി വി.മുരളീധരന്‍ എറണാകുളത്ത് യാത്ര ഉദ്ഘാടനം ചെയ്യും.
മുന്‍സംസ്ഥാന അദ്ധ്യക്ഷന്‍മാരായ കുമ്മനം രാജശേഖരന്‍ പത്തനംതിട്ടയിലും പികെ കൃഷ്ണദാസ് കോട്ടയത്തും ത്രിവര്‍ണ്ണ യാത്രയ്‌ക്ക് നേതൃത്വം നല്‍കും. സംസ്ഥാന ജനറല്‍ സെക്രട്ടറിമാരായ എംടി രമേഷ് തൃശ്ശൂരും പി.സുധീര്‍ ആലപ്പുഴയിലും ജോര്‍ജ് കുര്യന്‍ തിരുവനന്തപുരത്തും യാത്ര നയിക്കും. സംസ്ഥാന വൈസ്പ്രസിഡന്റ് എ.എന്‍ രാധാകൃഷ്ണന്‍ കോഴിക്കോട് യാത്രയ്‌ക്ക് നേതൃത്വം നല്‍കും. പാര്‍ട്ടിയുടെ മറ്റു സംസ്ഥാന ഭാരവാഹികള്‍ അവരുടെ മറ്റു ജില്ലകളില്‍ ത്രിവര്‍ണ്ണ യാത്രകള്‍ക്ക് നേതൃത്വം നല്‍കും
പ്രതികരിക്കാൻ ഇവിടെ എഴുതുക: