മാനന്തവാടി: കെഎസ്ആര്‍ടിസി ജീവനക്കാര്‍ വര്‍ഷങ്ങളായി നേരിടുന്ന പ്രശ്‌നങ്ങളുയര്‍ത്തി കക്ഷിരാഷ്‌ട്രീയ, കാറ്റഗറി ഭേദമെന്യേ ഒറ്റക്കല്ല ഒരുമിച്ച് എന്ന മുദ്രാവാക്യമുയര്‍ത്തി പ്രതിഷേധം സംഘടിപ്പിച്ചു. കൊവിഡ് മാനദണ്ഡങ്ങള്‍ പൂര്‍ണമായും പാലിച്ചുകൊണ്ട് ആയിരുന്നു പ്രതിഷേധം.
കറുത്ത തുണി കൊണ്ട് മുഖം മറച്ച് മുഖമില്ലാത്ത ജീവിതങ്ങള്‍ എന്ന സന്ദേശവുമായി, പ്ലക്കാര്‍ഡുകള്‍ ഉയര്‍ത്തിപ്പിടിച്ച് ആയിരുന്നു സമരം സംഘടിപ്പിച്ചത്. പത്തുവര്‍ഷം മുമ്പേയുള്ള ശമ്പളത്തില്‍ ആണ് ജീവനക്കാര്‍ ഇപ്പോഴും ജോലി ചെയ്യുന്നത്. 2016ല്‍ ആയിരുന്നു ശമ്പളം പരിഷ്‌കരിക്കേണ്ടിയിരുന്നത്. തുടര്‍ന്ന് 2021ല്‍ വീണ്ടും ശമ്പളം പരിഷ്‌കരിക്കേണ്ടിയിരുന്നു. ഈ രണ്ടു പരിഷ്‌കരണങ്ങളും ഇതുവരെ നടപ്പിലാക്കിയിട്ടില്ല. മാത്രവുമല്ല അശാസ്ത്രീയവും നിയമവിരുദ്ധമായി ഡ്യൂട്ടികള്‍ പരിഷ്‌കരിച്ചു കൊണ്ടിരിക്കുകയുമാണ്.
എല്ലാ മാസവും 10 ദിവസമെങ്കിലും വൈകിയാണ് ശമ്പളം ലഭിക്കാറ്. ഇതുകാരണം ബാങ്ക് തിരിച്ചടവുകള്‍ പലതും മുടങ്ങി ജീവനക്കാര്‍ പിഴപ്പലിശ കൊടുക്കേണ്ടി വരുന്നു. തങ്ങള്‍ക്കുവേണ്ടി ശബ്ദമുയര്‍ത്തേണ്ടവര്‍ വര്‍ഷങ്ങളായി മൗനംപാലിച്ചപ്പോള്‍, ജീവനക്കാര്‍ മൗനം വെടിഞ്ഞ് ഒറ്റക്കെട്ടായ് പ്രതിഷേധിക്കുകയായിരുന്നു. പറവൂര്‍ ഡിപ്പോയില്‍ ആരംഭിച്ച ഐക്യ സമരം കേരളത്തിലെ ഡിപ്പോകളിലെക്കെല്ലാം വ്യാപിച്ചുകൊണ്ടിരിക്കുകയാണ്.
മാനന്തവാടിയില്‍ നടന്ന പരിപാടിയില്‍ റെജി മാത്യു, സുനില്‍ മോന്‍, ബൈജു. എന്‍.ബി എന്നിവര്‍ സംസാരിച്ചു. അമിത ജോലി ഭാരം, മാനസിക സംഘര്‍ഷം, സാമ്പത്തിക പരാധീനതകള്‍, വിശ്രമ കുറവ് എന്നീ കാരണങ്ങളാല്‍ ചുരുങ്ങിയ കാലയളവില്‍ തന്നെ നൂറുകണക്കിന് കെഎസ്ആര്‍ടിസി ജീവനക്കാരാണ് മരണപ്പെട്ടത്. പരിപാടിക്കിടയില്‍ മൗന പ്രാര്‍ത്ഥനയിലൂടെ മരണപ്പെട്ട സഹപ്രവര്‍ത്തകര്‍ക്കും പരിപാടിയില്‍ ആദരാഞ്ജലികളര്‍പ്പിച്ചു.
പ്രതികരിക്കാൻ ഇവിടെ എഴുതുക: