കാബൂള്‍: അഫ്ഗാനിസ്ഥാനിലെ ചരിത്രവിജയത്തില്‍ താലിബാനെ അഭിനന്ദിച്ച് അല്‍ ഖ്വെയ്ദ. അല്‍ ഖ്വെയ്ദയുടെ മുതിര്‍ന്ന നേതാക്കളാണ് താലിബാന്റെ വിജയത്തെ പ്രകീര്‍ത്തിച്ച് അഭിനന്ദന സന്ദേശം പുറപ്പെടുവിച്ചിരിക്കുന്നത്.
കാബൂളിലെ പ്രസിഡന്‍റിന്റെ കൊട്ടാരത്തില്‍ നിന്നും വീണ്ടും ഖുറാന്‍ വരികള്‍ പാരായണം ചെയ്യുന്നത് കേട്ട് വീണ്ടും ഹൃദയത്തെ ആശ്വസിപ്പിക്കുമെന്നും അവര്‍ പറഞ്ഞു. ഒരു അമേരിക്കന്‍ വാര്‍ത്താ വെബ്‌സൈറ്റിലാണ് ഈ വാര്‍ത്ത.
‘സര്‍വ്വവ്യാപിയായ ദൈവത്തെ ഞങ്ങള്‍ വാഴ്‌ത്തുന്നു. അവിശ്വാസത്തിന്റെ എല്ലാമായ അമേരിക്കയെ പരാജയപ്പെടുത്തുകയും അപമാനിക്കുകയും ചെയ്ത ദൈവത്തെ വാഴ്‌ത്തുന്നു. അമേരിക്കയെ ഇസ്ലാമിക് നാടായ അഫ്ഗാനിസ്ഥാനില്‍ പുറന്തള്ളിയ ദൈവത്തെ ഞങ്ങള്‍ വാഴ്‌ത്തുന്നു,’ അല്‍ ഖ്വെയ്ദ നേതാക്കള്‍ പറയുന്നു.
മോചിപ്പിക്കേണ്ട മറ്റ് സ്ഥലങ്ങളുടെ പേരുകളും അല്‍ ഖ്വെയ്ദയുടെ പ്രസ്താവനയില്‍ പരാമര്‍ശിക്കുന്നു. പലസ്തീന്‍, മഗ്‌റെബ്, സോമാലിയ, യെമന്‍, ജമ്മു കശ്മീര്‍ എന്നിവയെക്കൂടി മോചിപ്പിക്കണമെന്നും അല്‍ ഖ്വെയ്ദ ആവശ്യപ്പെടുന്നു.താലിബാന്‍ നിയന്ത്രണത്തിലുള്ള അഫ്ഗാനിസ്ഥാനില്‍ വീണ്ടും അല്‍ ഖ്വെയ്ദ ഉയര്‍ത്തെണീക്കുകയാണെന്ന് ഈ പ്രസ്താവന സൂചിപ്പിക്കുന്നു. അഫ്ഗാന്റെ മണ്ണില്‍ അല്‍ ഖ്വെയ്ദയ്‌ക്കും ഇസ്ലാമിക് സ്റ്റേറ്റിനും അഭയം നല്‍കില്ലെന്ന് താലിബാന്‍ മറ്റ് രാഷ്‌ട്രങ്ങള്‍ക്ക് നല്‍കിയ ഉറപ്പിന് അര്‍ത്ഥമില്ലാതായിരിക്കുന്നു.
താലിബാനും അല്‍ ഖ്വെയ്ദയും തമ്മിലുള്ള ബന്ധമാണ് മറനീക്കി പുറത്തുവരുന്നത്. അല്‍ ഖ്വെയ്ദ 20 വര്‍ഷം മുന്‍പ് ട്വിന്‍ ടവര്‍ തകര്‍ത്ത് നടത്തിയ തീവ്രവാദ അക്രമത്തെ തുടര്‍ന്നാണ് അമേരിക്ക അഫ്ഗാനിസ്ഥാനെ ആക്രമിച്ചത്. എന്നാല്‍ 20 വര്‍ഷത്തിന് ശേഷം അമേരിക്ക പിന്‍മാറുമ്പോള്‍ വീണ്ടും അഫ്ഗാനില്‍ അല്‍ ഖ്വെയ്ദ പിടിമുറുക്കുന്ന ഭീതിദമായ ചിത്രമാണ് പുറത്ത് വരുന്നത്.
പ്രതികരിക്കാൻ ഇവിടെ എഴുതുക: