ചെറുതോണി: സ്വയംസഹായ സംഘത്തിലെ പണമിടപാടുമായി ബന്ധപ്പെട്ട് മാനസിക രോഗിയായ യുവതിയെ മര്‍ദിച്ചതായി പരാതി. മുരിക്കാശ്ശേരി തേക്കിന്‍ തണ്ട് മുണ്ടക്കല്‍ ഷാജിയുടെ ഭാര്യ മോളി ഷാജിയാണ് മര്‍ദ്ദനമേറ്റ് ഇടുക്കി മെഡിക്കല്‍ കോളജില്‍ ചികിത്സ തേടിയത്. കഴിഞ്ഞ ദിവസം വൈകിട്ട് തൊഴിലുറപ്പ് ജോലി കഴിഞ്ഞു മടങ്ങി വന്ന ഭര്‍ത്താവ് ഷാജിയെ അയല്‍വാസികളായ യുവാക്കള്‍ ചേര്‍ന്ന് മര്‍ദ്ദിക്കുന്നത് കണ്ട് തടസ്സം പിടിച്ചപ്പോഴാണ് മോളിക്ക് മര്‍ദ്ദനേറ്റത്.
തലയിലും മുഖത്തും ക്ഷതമേറ്റ മോളി നിലത്തു വീഴുകയും അവശയായ ഭാര്യയെ പോലീസില്‍ അറിയിച്ച ശേഷം മെഡിക്കല്‍ കോളേജില്‍ പ്രവേശിപ്പിക്കുകയായിരുന്നുവെന്നും ഷാജി പറഞ്ഞു. സ്വയംസഹായ സംഘത്തില്‍ നിന്നും വായ്പയെടുത്തതിന്റെ തിരിച്ചടവുമായി ബന്ധപ്പെട്ടുള്ള തര്‍ക്കമാണ് മര്‍ദ്ദനത്തില്‍ കലാശിച്ചത്.
എന്നാല്‍ സംഭവം വസ്തുതാ വിരുദ്ധമാണെന്നും തന്റെ പിതാവിനെ ഷാജി ഫോണിലൂടെ ചീത്തവിളിച്ചതായും ഇക്കാര്യം ചോദ്യം ചെയ്യുക മാത്രമാണ് ഉണ്ടായതെന്നും എതിര്‍ കക്ഷി രാജേഷ് പറഞ്ഞു. രാജേഷും സഹോദരന്‍ രജീഷും അടിമാലി താലൂക്ക് ആശുപത്രിയില്‍ ചികിത്സ തേടിയിരുന്നു. മുരിക്കാശ്ശേരി പോലീസ് കേസെടുത്ത് അന്വേഷണം ആരംഭിച്ചു.
പ്രതികരിക്കാൻ ഇവിടെ എഴുതുക: