കടയ്‌ക്കല്‍: സിപിഎമ്മിന്റെ കൊലപാതക രാഷ്‌ട്രീയത്തിന് പേരുകേട്ട കടയ്‌ക്കലില്‍ ബിജെപി നേതാവിന്റെ വീടിനു നേരെ ബോംബേറ്. ബോംബേറില്‍ വീടിന്റെ ജനല്‍പ്പാളിയും ചില്ലുകളും തകര്‍ന്നു. ബിജെപി കടയ്‌ക്കല്‍ പഞ്ചായത്ത് സമിതി വൈസ് പ്രസിഡന്റ് വടക്കേവയല്‍ സിന്ധു സദനത്തില്‍ രതിരാജന്റെ വീടിനു നേരെയാണ് ചൊവ്വാഴ്ച രാത്രി 10.30ന് ബോബേറുണ്ടായത്.
രാത്രി ഉറക്കത്തില്‍ ജനല്‍ തകര്‍ത്തുകൊണ്ട് രണ്ട് പാറക്കഷണങ്ങള്‍ മകളുടെ കിടക്കയില്‍ വീണു. ഞെട്ടിയുണര്‍ന്നപ്പോള്‍ വീടിനു മുന്നില്‍ വലിയ സ്‌ഫോടന ശബ്ദം കേട്ടതായി രതിരാജന് പറഞ്ഞു. ലൈറ്റിട്ട് കതകു തുറന്നപ്പോഴേക്കും രണ്ടുപേര്‍ ഓടുന്നത് തെരുവുവിളക്കിന്റെ വെട്ടത്തില്‍ വ്യക്തമായി.
കടയ്‌ക്കല്‍ സര്‍വീസ് സഹകരണ ബാങ്ക് ജീവനക്കാരനും ഡിവൈഎഫ്‌ഐ മേഖലാ സെക്രട്ടറിയുമായ വിഷ്ണുലാലും മറ്റൊരു സിപിഎമ്മുകാരനായ വിശാലുമായിരുന്നു അത്. ഇവരെ പിന്തുടരാന്‍ ശ്രമിച്ച തനിക്കു നേരെ ബോംബെറിയാന്‍ ശ്രമിച്ച വിഷ്ണുലാലിന്റെ കൈയിലിരുന്ന് ബോംബു പൊട്ടുകയായിരുന്നെന്നും മറ്റു ചില സിപിഎമ്മുകാരും ഇവര്‍ക്കൊപ്പമുണ്ടായിരുന്നതായും രതിരാജന് പറഞ്ഞു.
മുന്‍പും രതിരാജന് നേരെ ആക്രമണമുണ്ടായിട്ടുണ്ട്. നാല്‍ക്കാലിയുടെ കാലടിച്ചൊടിച്ചും കൃഷി നശിപ്പിച്ചും നിരന്തരം ദ്രോഹിക്കുകയാണ്. പഞ്ചായത്ത് തെരഞ്ഞെടുപ്പില്‍ സ്ഥാനാര്‍ത്ഥിയായതിന് ഇദ്ദേഹത്തിന്റെ ജീപ്പ് നേരത്തെ തോട്ടിലേക്ക് മറിച്ചിട്ടു. വൃദ്ധയായ അമ്മയും ഭാര്യയും മക്കളുമടങ്ങുന്ന കുടുംബം സിപിഎമ്മിന്റെ നിരന്തരമായ അക്രമത്തില്‍ ഭയന്നാണ് കഴിയുന്നത്.
പ്രതികരിക്കാൻ ഇവിടെ എഴുതുക: