മലപ്പുറം: പ്രമുഖ ഇടത് നേതാവും മലപ്പുറം നഗരസഭാ ചെയര്‍മാനുമായിരുന്ന സാധു റസാഖ് ബിജെപിയില്‍ ചേര്‍ന്നു. വിജയ യാത്രയ്‌ക്ക് മലപ്പുറത്ത് നല്‍കിയ സ്വീകരണ പരിപാടിക്കിടെ ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ അദേഹത്തെ പാര്‍ട്ടിയിലേക്ക് സ്വീകരിച്ചു. ഐഎന്‍എല്‍ ജില്ലാ ട്രഷറര്‍ സ്ഥാനം രാജിവെച്ചാണ് ബിജെപിയില്‍ ചേര്‍ന്നത്.
ദേശീയതയ്‌ക്കൊപ്പം ചേര്‍ന്ന് പ്രവര്‍ത്തിക്കാന്‍ ആഗ്രഹിക്കുന്നതുകൊണ്ടാണ് ബിജെപിയില്‍ അംഗമാകാന്‍ തീരുമാനിച്ചതെന്ന് അദേഹം പറഞ്ഞു. കേരളാ കോണ്‍ഗ്രസ് ബി മലപ്പുറം ജില്ലാ സെക്രട്ടറി അബ്ദുല്‍ ഗഫൂര്‍ സിപിഎം നേതാവ് ശിവശങ്കരന്‍ നമ്പീശന്‍ എന്നിവരും ബിജെപി അംഗത്വം സ്വീകരിച്ചു.
മലപ്പുറം മുന്‍സിപ്പല്‍ സ്റ്റേഡിയത്തില്‍ നടന്ന പരിപാടിയില്‍ ബിജെപി മുന്‍ സംസ്ഥാന അധ്യക്ഷന്‍ സികെ പദ്മനാഭന്‍ സംസ്ഥാന ജനറല്‍ സെക്രട്ടറി അഡ്വ. ജോര്‍ജ് കുര്യന്‍ എന്നിവര്‍ സംസാരിച്ചു. യാത്ര മലപ്പുറം ജില്ലയിലെ താനൂര്‍, വളാഞ്ചേരി, എടപ്പാള്‍ എന്നിവിടങ്ങളിലെ സ്വീകരണ സമ്മേളനങ്ങളില്‍ ഇന്ന് പര്യടനം നടത്തും. ഇന്ന് വൈകുന്നേരം എടപ്പാളില്‍ ചേരുന്ന പൊതുസമ്മേളനം കേന്ദ്രമന്ത്രി ആര്‍കെ സിങ് ഉദ്ഘാടനം ചെയ്യും.
പ്രതികരിക്കാൻ ഇവിടെ എഴുതുക: