ഉദുമ: ജില്ലയുടെ അതിര്‍ത്തി പ്രദേശങ്ങളിലും മലയോര പ്രദേശങ്ങളില്‍ കാട്ടുപന്നികളുടെ ശല്യം രൂക്ഷമാണ്. മനുഷ്യരെ അക്രമിക്കുന്നതിന് പുറമെ ഇവ വന്‍തോതില്‍ കൃഷി നശിപ്പിക്കുകയും ചെയ്യുന്നു. വിളകള്‍ നശിപ്പിക്കുന്നതിനാല്‍ കര്‍ഷകരില്‍ പലരും കൃഷി ഉപേക്ഷിക്കേണ്ട അവസ്ഥയിലെത്തിയിട്ടുണ്ട്.
സുഭിക്ഷ കേരളം പദ്ധതിയുടെ ഭാഗമായി ഇറക്കിയ കൃഷി പലയിടങ്ങളിലും പന്നികള്‍ നശിപ്പിച്ചു. ഇതുസംബന്ധിച്ച പരാതികള്‍ പെരുകുമ്പോഴും വനംവകുപ്പ് അധികൃതര്‍ നടപടിയൊന്നും സ്വീകരിക്കുന്നില്ല. കാട്ടുപന്നികളെ വെടിവെച്ചുകൊല്ലാനുള്ള ഉത്തരവിറങ്ങി മാസങ്ങള്‍ കഴിഞ്ഞിട്ടും ജില്ലയില്‍ ഒരാള്‍ക്കുപോലും അനുമതി നല്‍കിയിട്ടില്ല.
പന്നികളെ കൊല്ലാനുള്ള അനുമതി ആവശ്യപ്പെട്ട് 11 പേര്‍ വനംവകുപ്പിന് അപേക്ഷ നല്‍കിയിട്ടുണ്ട്. ഡിഎഫ്ഒക്ക് നേരിട്ട് അപേക്ഷ നല്‍കിയവര്‍ക്കുപോലും അനുമതി കിട്ടുന്നില്ല. തോക്ക് ഉപയോഗിക്കാന്‍ ലൈസന്‍സുള്ളവരില്‍ നിന്ന് പന്നിയെ വെടിവെക്കാന്‍ സന്നദ്ധരായവരുടെ പട്ടിക തയ്യാറാക്കാന്‍ ഡിവിഷനല്‍ ഫോറസ്റ്റ് ഓഫീസര്‍മാരെ ചുമതലപ്പെടുത്തിയിരുന്നു.
എന്നാല്‍ ജില്ലയില്‍ ഇതുവരെ പട്ടിക തയ്യാറാക്കിയിട്ടില്ല. കാട്ടുപന്നികളെ ആറ് മാസത്തേക്ക് വെടിവെച്ചുകൊല്ലാന്‍ 2020 മെയ് 18നാണ് സര്‍ക്കാര്‍ ഉത്തരവിറക്കിയത്. ഇതിന്റെ കാലാവധി അവസാനിച്ചെങ്കിലും വീണ്ടും ആറുമാസത്തേക്ക് കൂടി നീട്ടിയിട്ടുണ്ട്. അടുത്ത മെയ് 17 വരെയാണ് നിവലില്‍ പന്നികളെ കൊല്ലാന്‍ അനുമതിയുള്ളത്. ജില്ലയിലെ നഗരങ്ങളില്‍ പോലും പന്നികള്‍ ഇറങ്ങുകയാണ്.
കാട്ടുപന്നികളുടെ പരാക്രമം ഏറെയുള്ള പ്രദേശങ്ങളില്‍ സ്ത്രീകളും കുട്ടികളും പുറത്തിറങ്ങാന്‍ പോലും ഭയക്കുകയാണ്. രണ്ടുമാസത്തിനിടെ കാട്ടുപന്നിയുടെ അക്രമണത്തില്‍ കൊല്ലപ്പെട്ടത് രണ്ടുപേര്‍. കാട്ടുപന്നികളുടെ കുത്തേറ്റ് പരിക്കേല്‍ക്കുന്നവരുടെ എണ്ണവും പെരുകുന്നു.
പ്രതികരിക്കാൻ ഇവിടെ എഴുതുക: