കല്‍പ്പറ്റ: എടവക ഗ്രാമ പഞ്ചായത്തിലെ പത്താം വാര്‍ഡ് കമ്മനയില്‍ സിപിഐയും, സിപിഎമ്മും നേര്‍ക്ക് നേര്‍.എല്‍ഡിഎഫ് ഘടകകക്ഷിയായ സിപിഐയെ സിപിഎം പൂര്‍ണ്ണമായും തഴയുകയായിരുന്നു. എടവക ഗ്രാമ പഞ്ചായത്തില്‍ ഒരു സീറ്റ് പോലും സിപിഐക്ക് നല്‍കാന്‍ സിപിഎം തയ്യാറായില്ല. ഇതിനെതുടര്‍ന്നാണ് കമ്മനയില്‍ സിപിഐ സിപിഎമ്മിനെതിരെ മല്‍സരിക്കുന്നത്.
കഴിഞ്ഞ ത്രിതല പഞ്ചായത്ത് തെരഞ്ഞെടുപ്പില്‍ എടവക ഗ്രാമ പഞ്ചായത്തില്‍ സിപിഎം സിപിഐക്ക് ഒരു സീറ്റ് നല്‍കിയിരുന്നു. സിപിഎമ്മിലെ എം. സന്തോഷ് ചുറ്റിക അരിവാള്‍ നക്ഷത്രത്തില്‍ മത്സരിക്കുമ്പോള്‍ സിപിഐയിലെ രജിത്ത് കുമാര്‍ എന്ന കുട്ടന്‍ അരിവാള്‍ നെല്‍ക്കതിര്‍ അടയാളത്തിലാണ് മത്സരരംഗത്തുള്ളത്. യുഡിഎഫിലെ കമ്മനമോഹനന്‍ കൈപത്തി അടയാളത്തില്‍ മത്സരിക്കുന്നുണ്ട്. കമ്മന വാര്‍ഡില്‍ 1488 വോട്ടര്‍മാരാണുള്ളത്. സിപിഐയും സിപിഎമ്മും പാര്‍ട്ടി ചിഹ്നങ്ങളില്‍ നേര്‍ക്ക് നേര്‍ മത്സരിക്കുന്നതിനാല്‍ ജില്ലയില്‍ കമ്മന വാര്‍ഡ് ഏറെ ശ്രദ്ധ നേടിയിട്ടുണ്ട്. സിപിഎമ്മും സിപിഐയും വാശിയേറിയ പ്രചാരണമാണ് പത്താം വാര്‍ഡ് കമ്മനയില്‍ കാഴ്ചവെക്കുന്നത്.
പ്രതികരിക്കാൻ ഇവിടെ എഴുതുക: