വാഷിങ്ടണ്‍: ഇന്ത്യയുമായി മോശം ബന്ധത്തിലുള്ള ചൈനയ്ക്കും പാക്കിസ്ഥാനും കടുത്ത മുന്നറിയിപ്പുമായി യുഎസ് പ്രസിഡന്റ് തെരഞ്ഞെടുപ്പിലെ ഡെമോക്രാറ്റിക് സ്ഥാനാര്‍ത്ഥി ജോ ബൈഡന്‍. യുഎസ് പ്രസിഡന്റായി തെരഞ്ഞെടുക്കപ്പെട്ടാല്‍ അതിര്‍ത്തിയിലേത് ഉള്‍പ്പെടെ ഏതു പ്രശ്‌നത്തിലും ഇന്ത്യയ്‌ക്കൊപ്പമായിരിക്കും താനെന്നും ബൈഡന്‍ വ്യക്തമാക്കി. നവംബര്‍ മൂന്നിനു നടക്കുന്ന തിരഞ്ഞെടുപ്പില്‍ ഡോണാള്‍ഡ് ട്രംപിനെതിരെ സ്ഥാനാര്‍ഥിയായി മത്സരിക്കുന്ന ബൈഡന്‍ ഇന്ത്യയുടെ സ്വാതന്ത്ര്യസമരത്തിന്റെ ഭാഗമായി സംഘടിപ്പിച്ച ചടങ്ങില്‍ സംസാരിക്കുകയായിരുന്നു.
എച്ച്1ബി വീസ സംബന്ധിച്ച നിലവിലെ ചട്ടങ്ങളില്‍ ഭേദഗതി വരുത്തിയേക്കുമെന്ന തരത്തിലുള്ള ചില നിര്‍ദേശങ്ങളും ബൈഡന്‍ മുന്നോട്ടു വച്ചു. ദശാബ്ദങ്ങളായി രാജ്യത്തിന്റെ കരുത്തിനും ഇന്ത്യയെയും യുഎസിനെയും ഒരുമിച്ചു നിര്‍ത്തുന്നതിനും എച്ച്1ബി വീസ പോലുള്ള സംവിധാനങ്ങള്‍ വഹിച്ച പങ്ക് ചെറുതല്ല. യുഎസ് കമ്പനികള്‍ക്ക് ഇന്ത്യയില്‍നിന്നുള്‍പ്പെടെയുള്ള ജീവനക്കാരെ ചില പ്രത്യേക മേഖലകളിലെ വിദഗ്ധ സേവനത്തിനായി ലഭ്യമാക്കുന്നതിനു സഹായിക്കുന്ന നോണ്‍ഇമിഗ്രന്റ് വീസയാണ് എച്ച്1ബി. ട്രംപ് ഇതിനെതിരെ ശക്തമായ നിലപാട് സ്വീകരിച്ചിരുന്നു.
15 വര്‍ഷം മുന്‍പ് ഇന്ത്യയുമായുള്ള നിര്‍ണായക ആണവകരാര്‍ ഒപ്പിടുന്നതില്‍ താനും പ്രദാനപങ്ക് വഹിച്ചിരുന്നു. യുഎസും ഇന്ത്യയും തമ്മിലുള്ള ബന്ധം കൂടുതല്‍ ദൃഢമായാല്‍ ലോകത്ത് സമാധാനം പുലരുമെന്ന് ഉറപ്പാണ്. ചരിത്രത്തിലാദ്യമായി ഏറ്റവുമധികം ഇന്തോ-അമേരിക്കക്കാര്‍ ഭരണസംവിധാനത്തിനൊപ്പമുണ്ടായിരുന്നത് ഒബാമയുടെ ഭരണകാലത്താണ്. ഇത്തവണയും വൈസ് പ്രസിഡന്റ് സ്ഥാനത്ത് ഇന്തോ-അമേരിക്കക്കാരിയായ കമല ഹാരിസ് വരുമെന്നത് ഉറപ്പാണ്. വംശീയാതിക്രമങ്ങളുടെ ഇക്കാലത്ത് എല്ലാ വിഭാഗക്കാര്‍ക്കും മതത്തില്‍പ്പെട്ടവര്‍ക്കും സുരക്ഷിതമായി ജീവിക്കാനുള്ള ഇടമാണ് യുഎസ് എന്ന് ലോകത്തെ ധരിപ്പിക്കാന്‍ ഇന്ത്യക്കാരുടെ സാന്നിധ്യം വലിയ സഹായമാണു ചെയ്യുന്നതെന്നും ബൈഡന്‍ വ്യക്തമാക്കി.
പ്രതികരിക്കാൻ ഇവിടെ എഴുതുക: