കോട്ടയം: സര്‍ക്കാര്‍ പ്രഖ്യാപിച്ച ആയിരം രൂപയുടെ ധനസഹായം വേണമെങ്കില്‍ സിപിഎം ഓഫീസില്‍ എത്തണം. സിപിഎം ഓഫീസില്‍ എത്തുന്നവര്‍ക്ക് ലോക്കല്‍ സെക്രട്ടറി ആയിരം രൂപയുടെ ധനസഹായം നല്‍കും. സഹകരണ ബാങ്ക് വഴി വിതരണം ചെയ്യേണ്ട ധനസഹായമാണ് സിപിഎം ഓഫീസു വഴി വിതരണം വിതരണം ചെയ്യുന്നത്.
കോട്ടയം റെയില്‍വേ സ്‌റ്റേഷനു സമീപം മുള്ളന്‍കുഴിയിലാണ് സംഭവം. ഇന്നലെ രാവിലെ 10 മുതല്‍ സിപിഎം ഓഫീസിലേയ്‌ക്ക് ആയിരം രൂപയുടെ അര്‍ഹതയുള്ള ഗുണഭോക്താക്കളെ വിളിച്ചുവരുത്തുകയായിരുന്നു. കോടിമത സര്‍വ്വീസ് സഹകരണ ബാങ്ക് വഴി വിതരണം ചെയ്യേണ്ട ധനസഹായമാണ് സിപിഎം നേതാക്കളായ പി.കെ.പ്രകാശന്‍, ജിബിന്‍ വര്‍ഗ്ഗീസ് എന്നിവരുടെ നേതൃത്വത്തില്‍ വിതരണം ചെയ്തത്.
ഒരു ക്ഷേമനിധിയിലും ഉള്‍പ്പെടാത്തവരും ഇതുവരെ സഹായം ലഭിക്കാത്തവര്‍ക്കുമാണ് ആയിരം രൂപ വീതം നല്‍കുന്നത്. സിപിഎം ഓഫീസിലെ പണ വിതരണത്തെ എതിര്‍ത്ത ചില ഗുണഭോക്താക്കളെ സിപിഎം നേതാക്കള്‍ ഭീഷണിപ്പെടുത്തിയതായും പരാതിയുണ്ട്. എതിര്‍ത്താല്‍ സര്‍ക്കാരിന്റെ ഒരു ആനുകൂല്യവും കിട്ടില്ലെന്നും ആയിരം രൂപയും തിരിച്ചയക്കുമെന്നും നേതാക്കള്‍ പറഞ്ഞതായും ഇവര്‍ പറഞ്ഞു. കോടിമത സര്‍വ്വീസ് സഹകരണ ബാങ്കിലെ സിപിഎം ജീവനക്കാരുടെ ഒത്താശയോടെയാണ് പണ വിതരണം നടന്നത്.
പ്രതികരിക്കാൻ ഇവിടെ എഴുതുക: