തിരുവനന്തപുരം: മദ്യശാലകളെല്ലാം ഒരുമിച്ച് തുറക്കുമെന്നും എന്നാല്‍ എന്ന് തുറക്കണമെന്ന കാര്യം തീരുമാനിച്ചിട്ടില്ലെന്നും എക്‌സൈസ് മന്ത്രി ടി രാമകൃഷ്ണന്‍. വില്‍പ്പനശാലകള്‍ എന്ന് തുറക്കണമെന്ന് തീരുമാനിച്ചിട്ടില്ല. തീയതി പിന്നീട് അറിയിക്കുമെന്നും മന്ത്രി മാധ്യമങ്ങളോട് പറഞ്ഞു.
മുഴുവന്‍ ഔട്ട്‌ലറ്റുകളും ഒന്നിച്ചു തുറക്കുന്നതിന്റെ നടപടികളാണ് സര്‍ക്കാര്‍ തീരുമാനിക്കുന്നത്. ഇത്തരത്തില്‍ തുറക്കുന്ന ഔട്ട്‌ലറ്റുകളില്‍ തിരക്ക് കുറക്കാനായി മദ്യത്തിന് മുന്‍കൂറായി ഓണ്‍ലൈന്‍ ബുക്കിങ് സ്വീകരിക്കും. അതിന്റെ അടിസ്ഥാനത്തില്‍ ഔട്ട്‌ലറ്റുകള്‍ വഴി പണം വാങ്ങി മദ്യം വിതരണം ചെയ്യാനുമാണ് ഉദ്ദേശിക്കുന്നത്. കൂടാതെ ഔട്ട്‌ലറ്റുകളുടെ പ്രവര്‍ത്തന സമയം കുറക്കാനും ഉദ്ദേശിക്കുന്നുണ്ടെന്നും ടി.പി. രാമകൃഷ്ണന്‍ വ്യക്തമാക്കി.
കേരളത്തിന്റെ ഐ.ടി മിഷനും സ്റ്റാര്‍ട്ടപ് മിഷനും ചേര്‍ന്നാണ് ഇതിനുള്ള ക്രമീകരണങ്ങള്‍ നടത്തുന്നത്. ബാര്‍ ഹോട്ടലുകള്‍ ഇപ്പോള്‍ തുറക്കാന്‍ സാധിക്കില്ല. അവിടെ ഇരുന്ന് മദ്യം കഴിക്കാന്‍ അനുവദിക്കില്ല. ബാര്‍ ഹോട്ടലില്‍ പ്രത്യേകം സജ്ജമാക്കുന്ന കൗണ്ടറുകള്‍ വഴി ബീവറേജ് കോര്‍പറേഷന്റെ വിലയില്‍ മദ്യം പാഴ്‌സല്‍ നല്‍കാന്‍ സാധിക്കും. അതിനുള്ള നിയമ ഭേദഗതി തയാറാക്കിയിട്ടുണ്ടെന്നും മന്ത്രി പറഞ്ഞു.
ബാറുകളില്‍ നിന്ന് പാഴ്‌സല്‍ വിതരണം ചെയ്യുന്നതിനും ആപ് സംവിധാനമൊരുക്കും. ഇത് പ്രകാരം ഒരാള്‍ക്ക് പരമാവധി മൂന്ന് ലിറ്റര്‍ വരെ മദ്യം വാങ്ങാം. ഒരിക്കല്‍ മദ്യം വാങ്ങിയാല്‍ അടുത്ത അവസരം അഞ്ച് ദിവസങ്ങള്‍ക്ക് ശേഷം മാത്രമേ ലഭിക്കൂ. കൗണ്ടറുകളില്‍ ഒരേ സമയം അഞ്ച് പേര്‍ക്ക് മാത്രമേ പ്രവേശനം അനുവദിക്കൂ.
കേന്ദ്ര സര്‍ക്കാര്‍ ലോക്ഡൗണ്‍ പ്രഖ്യാപിച്ച സാഹചര്യത്തിലാണ് മദ്യഷാപ്പുകള്‍ അടച്ചിട്ടത്. പിന്നീട് കേന്ദ്ര സര്‍ക്കാര്‍ ലോക്ഡൗണില്‍ ഇളവു വരുത്തുകയുണ്ടായി. അതിന്റെ പശ്ചാത്തലത്തില്‍ മദ്യ ഷാപ്പുകള്‍ തുറക്കാവുന്നതാണ്. അതിന്റെ ഭാഗമായാണ് കള്ളുഷാപ്പുകള്‍ തുറന്നു പ്രവര്‍ത്തിച്ചത്. ഇന്ത്യയിലുടനീളം മദ്യഷാപ്പുകള്‍ തുറന്നിട്ടുണ്ട്. ലൈസന്‍സ് നടപടികള്‍ പൂര്‍ത്തിയാവുന്നതോടെ മുമ്ബ് പ്രവര്‍ത്തിച്ചിരുന്ന കള്ള്ഷാപ്പുകളെല്ലാം തുറന്നു പ്രവര്‍ത്തിക്കാന്‍ നടപടി സ്വീകരിക്കുമെന്നും മന്ത്രി പറഞ്ഞു.
പ്രതികരിക്കാൻ ഇവിടെ എഴുതുക: