തിരുവനന്തപുരം: കോവിഡ് രോഗ പ്രതിരോധത്തിന്റെ പേരില്‍ മുഖ്യമന്ത്രി പിണറായി വിജയന് പുകഴ്‌ത്താനായി പിആര്‍ വര്‍ക്ക് ശക്തമായി തുടരുകയാണ്. സോഷ്യല്‍ മീഡിയയില്‍ അടക്കം ഇത്തരം പോസ്റ്റുകള്‍ സജീവവുമാണ്. ഇതിനിടെയാണ് പിണറായി സ്തുതിയ്‌ക്കായി പാര്‍ട്ടി പത്രം ദേശാഭിമാനി ഇന്നത്തെ ഏഴാം പേജില്‍ ഓസ്‌ട്രേലിയയില്‍ നിന്നുള്ള ഒരു ചിത്രം പ്രസിദ്ധീകരിച്ചിരിക്കുന്നത്. താങ്ക്‌സ് പിണറായി എന്നു രേഖപ്പെടുത്തിയ ബോര്‍ഡ് ഒരു വലിയ കെട്ടിടത്തില്‍ സ്ഥാപിച്ചിരിക്കുന്നതാണ് ചിത്രം. ചിത്രത്തിനൊപ്പം ദേശാഭിമാനി പറയുന്നത് ഇങ്ങനെയാണ്- കോവിഡിനെ പ്രതിരോധിക്കാന്‍ മുന്നില്‍ നിന്ന് നയിക്കുന്ന കേരള മുഖ്യമന്ത്രി പിണറായി വിജയന് ആദരമര്‍പ്പിച്ച് ഓസ്‌ട്രേലിയയിലെ മെല്‍ബണ്‍ നഗരത്തില്‍ സ്ഥാപിച്ച ബോര്‍ഡ്. അവിടത്തെ പ്രധാന മൊബൈല്‍ഫോണ്‍ സേവനദാതാക്കളായ ടെല്‍സ്ട്രയുടെ കെട്ടിടത്തിലാണ് ഈ ബോര്‍ഡ് സ്ഥാപിച്ചിരിക്കുന്നത് എന്നാണ്.
ചിത്രത്തിനു പിന്നിലെ വസ്തുത പോലും അന്വേഷിക്കാതെയാണ് പത്രം ഇത് ഈ അടിക്കുറിപ്പോടെ പ്രസിദ്ധീകരിച്ചത്. യഥാര്‍ത്ഥത്തില്‍ ഇതു ഓസ്‌ട്രേലിയയിലെ മൊബൈല്‍ കമ്പനിയായ ടെല്‍സ്ട്രയുടെ ഒരു ഓണ്‍ലൈന്‍ ക്യാംപെയ്ന്‍ ആയിരുന്നു. കോറോണ നേരിടുന്നതില്‍ സഹായിക്കുന്നവരെ പ്രോത്സഹിപ്പിക്കാനുള്ള ഒരു ക്യാംപെയ്ന്‍. ഓസ്‌ട്രേലിയയില്‍ ഒള്ള ആര്‍ക്കും നിങ്ങള്‍ക്ക് നന്ദി അറിയിക്കേണ്ടവരുടെ പേരും അതിനുള്ള ചെറിയ കാരണവും കമ്പനി നല്‍കിയിട്ടുള്ള 0484 എന്ന നമ്പരിലേക്ക് എസ്എംഎസ് അയച്ചാല്‍ മതി. വ്യക്തിയുടെ പേര് കമ്പനി ബോര്‍ഡില്‍ പ്രദര്‍ശിപ്പിക്കയും അതിന്റെ ചിത്രം നിങ്ങള്‍ക്ക് എംഎംഎസായി അയയ്‌ക്കുകയും ചെയ്യാം. ഇതിനു ചെറിയ സര്‍വീസ് ചാര്‍ജ് ഈടാക്കും. ഈ ചിത്രം സോഷ്യല്‍ മീഡിയയില്‍ പ്രചരിപ്പിക്കാനുള്ള അനുമതിയും കമ്പനി നല്‍കും.
ഇത്തരത്തില്‍ ആരോ നല്‍കിയ പേരാണ് പിണറായിയുടേത്. ഈ ചിത്രമാണ് ദേശാഭിമാനി കോവിഡിനെ പ്രതിരോധിക്കാന്‍ മുന്നില്‍ നിന്ന് നയിക്കുന്ന കേരള മുഖ്യമന്ത്രി പിണറായി വിജയന് ആദരമര്‍പ്പിച്ച് ഓസ്‌ട്രേലിയയിലെ മെല്‍ബണ്‍ നഗരത്തില്‍ സ്ഥാപിച്ച ബോര്‍ഡ് എന്ന തരത്തില്‍ പ്രസിദ്ധീകരിച്ചത്. ഈ ചിത്രം വന്നതിനു പിന്നാലെ പലരും തങ്ങളുടെ പേര് ബോര്‍ഡില്‍ തെളിഞ്ഞ ചിത്രം സോഷ്യല്‍മീഡിയയില്‍ വ്യാപകമായി പ്രചരിപ്പിച്ചു. നടന്‍ സന്തോഷ് പണ്ഡിറ്റിന്റെ പേരും നന്ദി അറിയിച്ച് സോഷ്യല്‍ മീഡിയയില്‍ പോസ്റ്റ് ചെയ്തിട്ടുണ്ട്. പാര്‍ട്ടി പത്രം ദേശാഭിമാനിക്ക് മണ്ടത്തരം പറ്റിയതാണോ അതോ ആരെങ്കിലും പറ്റിച്ചതാണോ എന്നതാണ് ഇപ്പോഴത്തെ സോഷ്യല്‍ മീഡിയ ചര്‍ച്ച.
പ്രതികരിക്കാൻ ഇവിടെ എഴുതുക: