ബെംഗളുരു: കോവിഡ് വ്യാപിക്കാനുള്ള സാധ്യത കണക്കിലെടുത്ത് ജനങ്ങള്‍ ഒത്തുകൂടുന്ന ചടങ്ങുകളും മറ്റും നീട്ടിവെയ്‌ക്കണമെന്ന സര്‍ക്കാരിന്റെ അഭ്യര്‍ത്ഥന കണക്കിലെടുക്കാതെ മുന്‍ കര്‍ണ്ണാടക മുഖ്യമന്ത്രി എച്ച്. ഡി. കുമാരസ്വാമി. മകന്‍ നിഖില്‍ കുമാര സ്വാമിയുടെ വിവാഹം നേരത്തെ നിശ്ചയിച്ചതാണെങ്കിലും അടിയന്തിര സാഹചര്യം കണക്കിലെടുത്ത് ഇത് മാറ്റാന്‍ കുമാരസ്വാമി തയ്യാറായില്ലെന്നാണ് റിപ്പോര്‍ട്ടുകള്‍.
കോവിഡ് പടരുന്നത് തടയുന്നതിനായി കടുത്ത നിയന്ത്രണങ്ങളും അടച്ചുപൂട്ടലുകളും രാജ്യത്ത് പുരോഗമിക്കുമ്പോഴാണ് കര്‍ണാടക മുന്‍ മുഖ്യമന്ത്രിയായിരുന്ന കുമാരസ്വമിയുടെ നിരുത്തരവാദിത്തപരമായ പെരുമാറ്റം. ഏപ്രില്‍ 17നാണ് മകന്റെ വിവാഹം. ചടങ്ങില്‍ ബന്ധുക്കള്‍ക്കും ക്ഷണമുണ്ട്.
മുന്‍മന്ത്രി എം കൃഷ്ണപ്പയുടെ സഹോദരന്റെ മകള്‍ രേവതി ആണ് നിഖിലിന്റെ വധു. വിവാഹചടങ്ങുകള്‍ നടക്കുന്ന സ്ഥലം ഗ്രീന്‍ സോണില്‍ വരുന്നതാണെന്നും അതിനാല്‍ വിവാഹം നടത്തുന്നതില്‍ കുഴപ്പമില്ലെന്നും കുമാരസ്വാമി അറിയിച്ചു. വിവാഹത്തില്‍ അടുത്ത ബന്ധുക്കളും കുടുംബ സുഹൃത്തുക്കളും മാത്രമാണ് പങ്കെടുക്കുന്നത്. വിവാഹസല്‍ക്കാരം പിന്നീടായിരിക്കുമെന്നും അദ്ദേഹം പറഞ്ഞു.
നേരത്തെ വിവാഹചടങ്ങിന്റെ വേദിയായി തീരുമാനിച്ചത് ബംഗളൂരിലായിരുന്നുവെങ്കിലും കൊറോണ വ്യാപന പശ്ചാത്തലത്തില്‍ നീട്ടിയ ലോക്ഡൗണിനെ തുടര്‍ന്ന് രാമനഗരത്തില്‍ വെച്ച്് വിവാഹച്ചടങ്ങുകള്‍ നടത്താനാണ് ഇപ്പോള്‍ തീരുമാനിച്ചിരിക്കുന്നത്.
അതേസമയം കര്‍ണ്ണാടകയില്‍ ഇതുവരെ 260 പേര്‍ക്കാണ് കോവിഡ് സ്ഥിരീകരിച്ചത്. വൈറസ് വ്യാപനം തടയുന്നതിനായി സംസ്ഥാന സര്‍ക്കാര്‍ സാധ്യമായ നടപടികളെല്ലാം തുടരുകയാണ്. അതിനിടെ ഈ സമയത്ത് വിവാഹം നടത്തുന്നത് മാറ്റിവെക്കണമെന്ന ആവശ്യവും ഉയര്‍ന്നിരുന്നു.
പ്രതികരിക്കാൻ ഇവിടെ എഴുതുക: