ആലത്തൂര്‍: ആഡംബര കാറില്‍ കടത്തിയ എട്ട് ചാക്ക് ഹാന്‍സ് പിടികൂടി.മണ്ണാര്‍ക്കാട് പാലോട് സ്വദേശി അബ്ദുള്‍ മജീദിനെ (32) കസ്റ്റഡിയിലെടുത്തു.
ഇന്നലെ ഉച്ചയ്‌ക്ക് 2.30 ഓടെ ദേശീയ പാത ആലത്തൂര്‍ സ്വാതി ജംഗ്ഷനില്‍ എക്‌സൈസും പോലീസും നടത്തിയ സംയുക്ത പരിശോധനയിലാണ് ഇയാളെ പിടികൂടിയത്. സിഫ്റ്റ് ഡിസൈര്‍ കാറിന്റെ പിന്‍ഭാഗത്ത് എട്ട് ചാക്കുകളിലായി 12,000 പാക്കറ്റ് ഹാന്‍സാണ് ഉണ്ടായിരുന്നത്.
കോയമ്പത്തൂരില്‍ മണ്ണാര്‍ക്കാട്ടേക്ക് കടത്തുകയായിരുന്നു. സ്ഥിരം വഴി ഒഴിവാക്കി ആലത്തൂര്‍ തിരുവില്വാമല ഒറ്റപ്പാലം വഴി കൊണ്ടുപോവാനുള്ള ശ്രമത്തിനിടയിലാണ് കാറും ഹാന്‍സും പിടികൂടിയത്.
കഴിഞ്ഞ ദിവസം കഞ്ചാവും ഹാന്‍സും ആലത്തൂരില്‍ പിടികൂടിയതിനെ തുടര്‍ന്ന് പോലീസും എക്‌സൈസും രാവിലെ മുതല്‍ ടൗണിലും പ്രധാന റോഡുകളില്‍ കര്‍ശന പരിശോധന നടത്തുന്നതിനിടെയാണ് ഇയാള്‍ പിടിയിലായത്.
ആലത്തൂര്‍ എസ്.ഐ.രവീന്ദ്രന്‍, പ്രൊബേഷണല്‍ എസ്.ഐ.ജയപ്രദീപ്, സീനിയര്‍ സി.പി.ഒ.സാജു, സന്ദീപ്, സൂരജ് ബാബു, എക്‌സൈസ് സി.ഐ.ക്ലമന്റ്, പ്രിവന്റീവ് ഇന്‍സ്‌പെക്ടര്‍ രാജേഷ്, സ്‌ക്വാഡ് അംഗങ്ങളായ ഷെരീഫ്, സജീഷ്, സന്തോഷ് എന്നിവര്‍ പരിശോധനയ്‌ക്ക് നേതൃത്വം നല്‍കി.
പ്രതികരിക്കാൻ ഇവിടെ എഴുതുക: