ഏഴ് ലക്ഷം കവര്‍ന്ന കേസില്‍ രണ്ട് പേര്‍ പിടിയില്‍

മണ്ണാര്‍ക്കാട്:ബൈക്ക് യാത്രക്കാരനില്‍ നിന്ന് ഏഴ് ലക്ഷം രൂപ കവര്‍ന്ന കേസില്‍ രണ്ടു പേരെ പോലീസ് അറസ്റ്റ് ചെയ്തു.

കൊട്ടേക്കാട് മൊളിയില്‍ മുകേഷ് (32), പുതുപ്പരിയാരം നൊച്ചുള്ളി ആനപ്പാറ ബിവിന്‍ (29) എന്നിവരെയാണ് അറസ്റ്റ് ചെയ്തത്. നേരത്തെ അഞ്ചുപേര്‍ അറസ്റ്റിലായിരുന്നു. ഇതോടെ കേസിലെ മുഴുവന്‍ പ്രതികളും പിടിയിലായി. ഫെബ്രുവരി 12ന് രാവിലെ 11.45ന് കുമരംപുത്തൂര്‍ പള്ളിക്കുന്നിലെ കളത്തില്‍ മുസ്തഫ ഏഴ് ലക്ഷം രൂപയുമായി കരിങ്കല്ലത്താണിയില്‍ നിന്ന് മണ്ണാര്‍ക്കാട്ടേക്ക് വരുന്നതിനിടെ ദേശീയ പാതയില്‍ കല്ലടി കോളജിനു സമീപത്തു നിന്നാണ് പണം കവര്‍ന്നത്.

മുസ്തഫ ബൈക്കില്‍ വരുന്നുണ്ടെന്ന വവിരം അറിഞ്ഞ് പ്രതികള്‍ കോളേജ് പരിസരത്തെത്തിയ മുസ്തഫയെ തടഞ്ഞ് പണം കവരുകയായിരുന്നു.

തമിഴ്‌നാട്ടില്‍ നിന്ന് 94 ലക്ഷം രൂപ കവര്‍ന്ന കേസിലും ഒരു കിലോ സ്വര്‍ണ്ണം കവര്‍ന്ന കേസിലും ഒരാളെ തട്ടികൊണ്ടു പോയ കേസിലും ഇവര്‍ക്ക് പങ്കുള്ളതായി സിഐ ഹിദായത്തുല്ല മാമ്പ്ര പറഞ്ഞു.

ബിവിന്‍ വിദേശത്തു നിന്ന് എംബിഎ ബിരുദം എടുത്തയാളാണ്.

ടൗണ്‍ നോര്‍ത്ത് എസ്‌ഐ രഞ്ജിത്, രാജിദ്, ആര്‍.വിനീഷ്, കിഷോര്‍, എം.സുനില്‍, മനീഷ്, ഷിജു എന്നിവരുടെ നേതൃത്വത്തിലുള്ള പോലീസ് സംഘം ഒലവക്കോടു നിന്നാണ് പിടികൂടിയത്.