കാസര്‍കോട്: മാര്‍കിസ്റ്റ് ക്രൂരതയ്‌ക്കെതിരെ മാതൃവിലാപം എന്ന മുദ്രാവാക്യമുയര്‍ത്തി സിപിഎമ്മുകാര്‍ വീട്ടില്‍ കയറി ചുട്ടുകൊന്ന ബിജെപി പ്രവര്‍ത്തക പാലക്കാട് കഞ്ചിക്കോട് ചടയന്‍ കലായി വിമലാ ദേവിയുടെ ചിതാഭസ്മ നിമഞ്ജന യാത്ര നാളെ ജില്ലയിലെത്തും. കഴിഞ്ഞ 26 ന് വിമലാദേവിയുടെ വീട്ടില്‍ നിന്നും പ്രയാണമാരംഭിച്ച യാത്രക്ക് ബിജെപി സംസ്ഥാന ജനറല്‍ സെക്രട്ടറി ശോഭാ സുരേന്ദ്രനാണ് നേതൃത്വം നല്‍കുന്നത്.
നാളെ ജില്ലാ അതിര്‍ത്തിയായ ഒളവറയില്‍ നിന്നും നിരവധി വാഹനങ്ങളുടെ അകമ്പടിയോടുകൂടി മാവുങ്കാലില്‍ നടക്കുന്ന ശ്രദ്ധാഞ്ജലി സമ്മേളനത്തിലേക്ക് നയിക്കും. മൂന്നു മണിക്ക് നടക്കുന്ന സമ്മേളനം ബിജെപി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍ ഉദ്ഘാടനം ചെയ്യും.
വൈകുന്നേരം 5 മണിക്ക് കാസര്‍കോട് നടക്കുന്ന സമാപന യോഗത്തില്‍ ദേശീയ നിര്‍വാഹക സമിതിയംഗം വി.മുരളീധരന്‍ പ്രസംഗിക്കും.
മാര്‍ച്ച് 3ന് ഹൊസങ്കടിയില്‍ രാവിലെ 10 മണിക്ക് നടക്കുന്ന വടക്കന്‍ മേഖലാചിതാഭസ്മ നിമഞ്ജന യാത്ര സമാപനത്തില്‍ ബിജെപി സംസ്ഥാന ജനറല്‍ സെക്രട്ടറിമാരായ കെ.സുരേന്ദ്രന്‍, എ.എന്‍.രാധാകൃഷ്ണന്‍, ശോഭാ സുരേന്ദ്രന്‍ തുടങ്ങിയ നേതാക്കള്‍ സംബന്ധിക്കും.
വിമലാ ദേവിയുടെ ചിതാഭസ്മം കണ്വ തീര്‍ത്ഥയില്‍ നിമഞ്ജനം ചെയ്യും. ശ്രദ്ധാഞ്ജലി സമ്മേളനങ്ങളോടനുബന്ധിച്ച് അക്രമ രാഷ്‌ട്രീയത്തിന്റെ കെടുതികള്‍ കാണിക്കുന്ന വീഡിയോ പ്രദര്‍ശനവും ഉണ്ടാകും. കാസര്‍കോട് ജില്ലയിലെ മൂന്നു കേന്ദ്രങ്ങളില്‍ നടക്കുന്ന പരിപാടികളുടെയൊരുക്കങ്ങള്‍ പൂര്‍ത്തിയായതായി നേതാക്കള്‍ അറിയിച്ചു.
പ്രതികരിക്കാൻ ഇവിടെ എഴുതുക: