കാഞ്ഞങ്ങാട്: വിഷുപ്പുലരിയെ വരവേല്‍ക്കാന്‍ നാടും നഗരവുമൊരുങ്ങി. വിഷുവിന്റെ വരവറിയിച്ചു ഇത്തവണ വളരെ നേരത്തെ തന്നെ തൊടികളില്‍ കര്‍ണികാരങ്ങള്‍ പൂത്തുലഞ്ഞിരുന്നു. വിഷുവിന്റെ ഏറ്റവും പ്രധാനപ്പെട്ട ചടങ്ങാണു വിഷുക്കണിയൊരുക്കല്‍. ഓട്ടുരുളിയില്‍ കണിക്കൊന്നപൂവിനൊപ്പം വയ്‌ക്കുന്ന കണിവെള്ളരിയും മറ്റു സാധനങ്ങളായ അരി, നെല്ല്, തേങ്ങ, മാങ്ങ, പഴം തുടങ്ങിയവ വാങ്ങുവാനായി വിപണിയില്‍ തിരക്ക് ആരംഭിച്ചു കഴിഞ്ഞു.
വിഷുക്കണി കഴിഞ്ഞാല്‍ പ്രധാനം വിഷു സദ്യയാണ്. കാളനും ഓലനും സാമ്പാറും അവിയലും പായസവുമൊക്കെ തയാറാക്കാനുള്ള വിഭവങ്ങള്‍ വാങ്ങാനുള്ള തിരക്കു വീട്ടമ്മമാര്‍ക്കാണ്. വിഷു പ്രമാണിച്ച് പച്ചക്കറികള്‍ക്ക് രണ്ടുദിവസമായി വില കൂടിയിരിക്കുകയാണ്. വസ്ത്രശാലകളിലും തിരക്കനുഭപ്പെടുന്നുണ്ട്. പടക്കവിപണിയും സജീവമായിട്ടുണ്ട്. ഓലപ്പടക്കവും വിവിധ നിറത്തിലും തരത്തിലുമുള്ള കമ്പിത്തിരികളും പൂത്തിരികളും, ചൈനീസ് പടക്കങ്ങളും വാങ്ങാന്‍ ആവശ്യക്കാരേറെയാണ്.വഴിയോരങ്ങളിലാണ് കച്ചവടം കൂടുതലും നടക്കുന്നത്. വിഷുപ്പുലരിയില്‍ കണികണ്ടുണരാന്‍ കണിവെള്ളരിയുമെത്തി. നാടന്‍ വെളളരിക്കു പുറമേ തമിഴ്‌നാട്ടില്‍ നിന്നും കണിവെള്ളരിയും ഇത്തവണ മാര്‍ക്കറ്റിലെത്തിയിട്ടുണ്ട്. വിഷുവിന് രണ്ട് ദിവസം ബാക്കിയുള്ളതിനാല്‍ ഇന്നും നാളെയും കൂടുതല്‍ തിരക്ക് അനുഭവപ്പെടും.
പ്രതികരിക്കാൻ ഇവിടെ എഴുതുക: