കല്‍പ്പറ്റ : കേരള സ്‌റ്റേറ്റ് ഹോ ള്‍ട്ടികള്‍ച്ചറള്‍ ആന്റ് അഗ്രി കള്‍ച്ചറല്‍ പ്രൊഡ്യൂസേഴ്‌സ് പ്രോസ്സസിംഗ് ആന്റ് മാര്‍ക്കറ്റിംഗ് സഹകരണസംഘത്തിന്റെ ഹെഡ് ഓഫീസായ പനമരം ബ്രാഞ്ചില്‍ വന്‍ അഴിമതി നടക്കുന്നതായി ഭാരതീ യ ജനതാപാര്‍ട്ടി വയനാട് ജില്ലക്കമ്മിറ്റി.
2006 ല്‍ പ്രവര്‍ത്തനം ആരംഭിച്ച കേന്ദ്ര ഗവണ്‍മെന്റിന്റെ കീഴിലുള്ള ഹോപ്‌കോ ചിലരുടെ കുടുംബ സ്വത്തായി മാറിക്കഴിഞ്ഞു. കോടിക്കണക്കിന് രൂപയുടെ ആസ്തി ഉണ്ടായിരുന്ന സംഘത്തിന്റെ ഇപ്പോഴത്തെ അവസ്ഥ പരിതാപകരമാണ്. വിവരാവകാശ പ്രകാരം ലഭിച്ച തെളിവുകള്‍ അനുസരിച്ച് ലക്ഷങ്ങളുടെ അഴിമതിയാണ് ഇവിടെ നടന്നിരിക്കുന്നത്. അന്വേഷണത്തിന് നിയോഗിക്കപ്പെട്ട കമ്മീഷനു മുമ്പില്‍ നല്‍കിയ കണക്കുകളും യഥാര്‍ത്ഥ കണക്കുകളും തമ്മില്‍ യാതൊരു ബന്ധവുമില്ല. ബാങ്കുകള്‍ മുഖേന സുതാര്യമായ പണമിടപാടുകള്‍ നടത്തണമെന്നിരിക്കെ ഉത്തരവാദിത്വപ്പെട്ട സ്ഥാനങ്ങളില്‍ ഇരിക്കുന്നവര്‍തന്നെ സ്വകാര്യ ബാങ്കുകളായി പ്രവര്‍ത്തിക്കുകയാണ്.
സംഘം തുടങ്ങിയ കാലം മുതല്‍ ഇവിടെ ജോലി ചെയ്യുന്ന തൊഴിലാളികള്‍ക്ക് കാലാനുസൃതമായ വേതന വര്‍ധനവ് നടപ്പിലാക്കുവാനോ തൊഴിലാളികള്‍ക്ക് നല്‍കേണ്ട ആനുകൂല്യങ്ങള്‍ നല്‍കുവാനോ സ്ഥാപന മേധാവികള്‍ തയ്യാറായിട്ടില്ല. ഇതര സംസ്ഥാനങ്ങളിലെ മെമ്പര്‍മാരടക്കമുള്ള ഈ സ്ഥാപനം കൊണ്ട് വയനാട്ടിലെ കര്‍ഷകര്‍ക്ക് യാതൊരു ഗുണവുമില്ല. ഈ അഴിമതി അന്വോഷിക്കണം എന്നാവശ്യപ്പെട്ട് ബിജെപി കേന്ദ്ര ഏജന്‍സിക്കും വിജിലന്‍സിനും പരാതി നല്‍കിയിട്ടുണ്ട്. സാധാരണക്കാരുടെ പേര് പറഞ്ഞ് കേന്ദ്രഫണ്ടുകള്‍ തട്ടിയെടുക്കുവാന്‍ അനുവിക്കില്ലെന്നും ഈ അഴിമതിക്കെതിരെ ശക്തമായ പ്രക്ഷോഭത്തിന് തയ്യാറാകുമെന്നും യോഗം മുന്നറിയിപ്പ് നല്‍കി.
ബിജെപി ജില്ലാ പ്രസിഡണ്ട് സജി ശങ്കര്‍ അധ്യക്ഷത വഹിച്ചു. കെ.സദാനന്ദന്‍, പി.ജി.ആനന്ദ്കുമാര്‍, കെ.മോഹന്‍ദാസ്, കെ.എം.പൊന്നു, വി.നാരായണന്‍, ലക്ഷ്മി ആനേരി, കെ.പി.മധു, വി.മോഹനന്‍, കെ.ശ്രീനിവാസന്‍, കേശവനുണ്ണി.പി.കെ, രജിത അശോകന്‍ തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: