ക്യാറ്റ് വുമണും തോറ്റു പോകും ഇവൾക്ക് മുന്നിൽ

സൂപ്പർ ഹീറോസ് അന്നും ഇന്നും നാളേയും മനുഷ്യ മനസുകളിൽ കൗതുകത്തിന്റെയും ആത്മധൈര്യത്തിന്റേയും പര്യായ പദമാണ്. ചിലപ്പോൾ നാടോടിക്കഥകളിലും സിനിമാ കഥകളിലും മാത്രം കണ്ട് വരുന്ന ചില അമാനുഷികർ യഥാർത്ഥ ജീവിതത്തിലും കാണാൻ സാധിക്കും. അത്തരത്തിലുള്ള ഒരു കഥാപാത്രം കഴിഞ്ഞ ദിവസം ലണ്ടനിൽ പ്രത്യക്ഷപ്പെട്ടു.

ഈ കഥാപാത്രം സൂപ്പർ ഹീറോ അല്ല, ഒരു സൂപ്പർ ഹീറോയിനാണ് എന്നാൽ ക്യാറ്റ് വുമണുമല്ല, ഒരു സുന്ദരിയായ ബ്രിട്ടീഷ് യുവതി. മഞ്ഞിൻ കണങ്ങൾ പുതച്ച് കിടക്കുന്ന ലണ്ടൻ തെരുവോരങ്ങളിൽ കറങ്ങി നടക്കവെയാണ് അവൾ ആ കാഴ്ച കണ്ട് ഞെട്ടിയത്. ഒരു പാവം നായക്കുട്ടി വടക്കൻ ലണ്ടനിലെ അലക്സാണ്ട്ര പാലസിനു സമീപത്തുള്ള തടാകത്തിൽ വീണ് മരണത്തോട് മല്ലിടിക്കുന്നത് കണ്ടത്.

ഒരു നിമിഷം ആ കാഴ്ച അവളെ പരിഭ്രാന്തിയിലാക്കിയെങ്കിലും ഒട്ടു ചിന്തിച്ച് നിൽക്കാതെ തണുത്തുറഞ്ഞ ആ തടാകത്തിലേക്ക് ഒരു ട്യൂബുമായി ചാടിയിറങ്ങി. ഈ കാഴ്ച കണ്ട് സമീപത്തുള്ളവർ ഞെട്ടിത്തരിച്ചെങ്കിലും യുവതിയുടെ സാഹസികയ്‌ക്ക് മുന്നിൽ അവർ അക്ഷരാർത്ഥത്തിൽ തല കുമ്പിട്ട് പോയി.

തണുത്തുറഞ്ഞ ജലത്തിൽ അവശ നിലയിൽ നീന്തിയിരുന്ന നായക്കുട്ടിയെ യുവതി കൈക്കുള്ളിലാക്കി കരയിലേക്ക് തുഴഞ്ഞ് കയറുകയായിരുന്നു.