ഗോത്രപഴമയുടെ വറ്റാത്ത നീരുറവയുമായി പാക്കം തിരുമുഖം

ബത്തേരി : അസാധാരണമായ മഴക്കുറവും അതേ തുടര്‍ന്നുണ്ടാകുന്ന ജലക്ഷാമവും ഗ്രാമീണ ജീവിതത്തിന്റെ താളംതെറ്റിക്കുമ്പോള്‍ ജില്ലയിലെ പുരാതന കുടിയിരുപ്പുകളില്‍ അങ്ങിങ്ങായി അവശേഷിക്കുന്ന പൗരാണികതയുടെ പ്രതീകങ്ങളായ പനം കുറ്റികളും തലക്കുളങ്ങളും ഇന്നും നിറഞ്ഞുകവിയുന്നത് പുതിയകാലം കൗതുകത്തോടെയാണ് നോക്കി കാണുന്നത്. നെല്‍വയലുകള്‍ക്ക് സമീപമുളളതും വനാന്തരങ്ങളിലെ കുടിയിരിപ്പുകള്‍ക്ക് സമീപവുമുളള ചതുപ്പുകളിലുമാണ് ഇത്തരം ചരിത്ര ശേഷിപ്പുകള്‍ ഇന്ന് കാണുന്നത്. ഈ ജലശ്രോതസ്സുകളില്‍ പലതും കഷ്ടിച്ച് ഒരു മീറ്റര്‍ ആഴവും ഒരുമീറ്റ ര്‍ ചുറ്റളവും മാത്രമുളള ജലസംഭരണികളാണ്. എപ്പോഴും നിറഞ്ഞ് കവിയുന്ന നീരൊഴുക്കാണിത്. പോയകാലത്ത് വയനാട്ടിലെ പ്രമുഖ പാടശേഖരങ്ങളിലെല്ലാം ധാരാളമായുണ്ടായിരുന്ന ഇത്തരം ജല സംഭരണികള്‍ ഏറെയും ഇതിനോടകം നഷ്ടമായികഴിഞ്ഞു. പ്രകൃതിയോടൊത്തിണങ്ങി ജീവിച്ച പിതാമഹന്മാരുടെ ദീര്‍ഘ വീക്ഷണത്തിന്റെ അടയാളം കൂടിയാണിവ. നൂറ് കണക്കിന് അടി ആഴത്തില്‍ കുഴല്‍ കിണറുകള്‍ കുഴിച്ചിട്ടും വെളളം കിട്ടാതെ നിരാശപ്പെടുന്ന പുതിയ തലമുറ ഇത്തരം പഴമകള്‍ പാഠമാക്കേണ്ടതാണ്. വയനാട് വന്യജീവി സങ്കേതത്തിന്റെ ഭാഗമായ ചെതലയം റെയ്ഞ്ചിലെ പാതിരി നോര്‍ത്തിലെ പാക്കം വനമേഖലയിലെ തിരുമുഖം കുറുമ്മകുടിയിലെ പനംകുറ്റിക്ക് ഇവരുടെ പഴമകള്‍ ഏറെ പറയാനുണ്ട്. കുറുമരുടെ പുരാതന രാജസ്ഥാനങ്ങളില്‍ ഒന്നാണ് പാക്കം തിരുമുഖം കുറുമക്കുടി. ഈ കുടിയിലേക്ക് വിവാഹം കഴിച്ചുകൊണ്ടുവരുന്ന പുതുപ്പെണ്ണ് ഇവിടുത്തെ മുതിര്‍ന്ന സ്ത്രീകളോടൊത്ത് ആചാരങ്ങളുടെ അകമ്പടിയോടെ പിച്ചളക്കുടത്തിലോ ചെമ്പ് കുടത്തിലോ ഒരു കുടം വെളളം ഈ പനംകുറ്റിയില്‍ നിന്ന് തലയിലേറ്റി ഭര്‍ത്താവിന്റെ വീട്ടിലെത്തുന്നതോടെയാണ് അവള്‍ ആ കുടംബത്തിലെ അംഗമാകുന്നത്. വിവാഹപ്പിറ്റേന്ന് പുലര്‍ച്ചെയാണ് ഈ ചടങ്ങ് നടത്തുന്നത്. ഇന്നും മുറതെറ്റാതെ ഇത് തുടരുന്നു. ആദിവാസിക്ഷേമത്തിന്റെ പേരില്‍ സര്‍ക്കാര്‍ സ്‌പോണ്‍സര്‍ ചെയ്ത കുടിവെളള പദ്ധതികളും കുഴല്‍ കിണറുകളും വരണ്ടുണങ്ങുമ്പോള്‍ പല വനവാസി വിഭാഗങ്ങളും അവശേഷിക്കുന്ന പനംകുറ്റികള്‍ സംരക്ഷിക്കാന്‍ പ്രത്യേക താത്പര്യമുളളവരാണ്. ഇവരുടെ അനുഷ്ഠാന ചടങ്ങുകള്‍ക്ക് ഇന്നും ഈ വെളളം മാത്രമാണ് ഉപയോഗിക്കുന്നത്. ശുദ്ധവൃത്തിയോടെ മാത്രമേ ഇവരുടെ സ്ത്രീകള്‍ ഈ ജലം മുക്കിയെടുക്കൂ. പ്രകൃതി പ്രതിഭാസങ്ങളേയും വനത്തേയും ജലത്തേയുമെല്ലാം ഭയ ഭക്തി ബഹുമാനത്തോടെ നോക്കികണ്ട പുരാതന ഗോത്ര നാഗരികതകളില്‍ നിന്ന് പുതിയ കാലത്തിനും ഏറെ പഠിക്കാനുണ്ടെന്നാണ് പഴമയുടെ ഈ ജല സമൃദ്ധി നമ്മെ ഓര്‍മ്മപ്പെടുത്തുന്നത്.